റിയോ ഡി ജനീറോ: പുരുഷ വിഭാഗം ഹോക്കിയില്‍ ഇന്ത്യ വീണ്ടും വിജയ വഴിയില്‍. അപാരാജിത കുതിപ്പോടെ മുന്നേറിയ അര്‍ജന്റീനക്കെതിരേ ആവേശകരമായ മത്സരത്തില്‍ ഒന്നിനെതിരേ രണ്ടു ഗോളുകള്‍ക്കാണ് ഇന്ത്യ വിജയിച്ചു കയറിയത്. ജയത്തോടെ ക്വാര്‍ട്ടര്‍ പ്രതീക്ഷികള്‍ സജീവമക്കാനും ഇന്ത്യക്കായി. ചിങ്ഗ്ലന്‍സാന കംഗുജവും കൊതജിത്തും ഇന്ത്യക്കായി ഗോളുകള്‍ നേടിയപ്പോള്‍ അര്‍ജന്റീനയുടെ ആശ്വാസ ഗോള്‍ ഗോണ്‍സാലോ പില്ലറ്റ് നേടി. ഇതോടെ കഴിഞ്ഞ മത്സരത്തില്‍ ഏറ്റ തോല്‍വിയില്‍ നിന്നു ഇന്ത്യ വീണ്ടും വിജയ വഴിയിലേക്കു തിരിച്ചെത്തി. കഴിഞ്ഞ മത്സരത്തില്‍ 2-1ന് ജര്‍മനിയോട് ഇന്ത്യ അവസാന നിമിഷത്തില്‍ തോറ്റിരുന്നു. രണ്ടു ജയവും ഒരു തോല്‍വിയുമായി പൂള്‍ ബിയില്‍ ഇന്ത്യ ജര്‍മനിക്കു തൊട്ടരികിലെത്തി.

മണിപ്പൂരികളാണ് ഇന്ത്യക്കായി വിജയ ഗോള്‍ നേടിയ ഇരു താരങ്ങളും. കളി തുടങ്ങി എട്ടാം മിനുട്ടില്‍ തന്നെ ഇന്ത്യക്ക് ഗോള്‍ കണ്ടെത്താനായി. സുന്ദരമായ ഫിനിഷിങ്ങോടെ ചിങ്ഗ്ലന്‍സാനയാണ് ആദ്യ ഗോള്‍ നേടിയത്. ആദ്യ നിമിഷത്തില്‍ തന്നെ ഗോള്‍ വഴങ്ങിയതോടെ പതറിയ അര്‍ജന്റീന കളിയിലേക്കു തിരിച്ചു വരാന്‍ പിന്നീട് സമയമെടുത്തു.

ആദ്യ ക്വാര്‍ട്ടറിലും രണ്ടാം ക്വാര്‍ട്ടറിലും ശക്തമായ തിരിച്ചുവരവു നടത്താന്‍ അര്‍ജന്റീന ശ്രമിച്ചെങ്കിലും ഗോള്‍ നേടാന്‍ സാധിച്ചില്ല. മൂന്നാം ക്വാര്‍ട്ടറില്‍ കൊതജിത്ത് ഇന്ത്യയുടെ സ്‌കോര്‍ ഉയര്‍ത്തി. കളി തീരാന്‍ എട്ടു മിനുട്ട് മാത്രം ബാക്കി നില്‍കേയായിരുന്നു നാലാം ക്വാര്‍ട്ടറില്‍ അര്‍ജന്റീനയുടെ ആശ്വാസ ഗോള്‍. ഗോണ്‍സാലോ പില്ലെറ്റ് പെനാല്‍റ്റി കോര്‍ണറിലാണ് സ്‌കോര്‍ കണ്ടെത്തിയത്.  മൂന്നോളം നിര്‍ണായക രക്ഷപ്പെടുത്തലുകളുമായി മലയാളി നായകന്‍ ശ്രീജേഷ് വിജയത്തില്‍ നിര്‍ണായകമായി. 2009 നു ശേഷം ഇതാദ്യമായാണ് ഇന്ത്യ അര്‍ജന്റീനയെ തോല്‍പ്പിക്കുന്നത്.