കല്‍പ്പറ്റ: കേരള സംസ്ഥാന ന്യൂനപക്ഷ വകുപ്പിന് കീഴില്‍ സര്‍ക്കാര്‍ സ്ഥാപനങ്ങള്‍ക്ക് മാതൃകയായി ന്യൂനപക്ഷ വിഭാഗത്തില്‍പ്പെട്ട വിദ്യാര്‍ഥികളുടെ ഉന്നമനം ലക്ഷ്യം വെച്ച് പ്രവര്‍ത്തിക്കുന്ന കല്‍പ്പറ്റയിലെ കോച്ചിങ് സെന്ററിന്റെ ശുചിമുറി കല്‍പ്പറ്റ പഴയ ബസ് സ്റ്റാന്‍ഡിന്റെ ക്ലോക്ക് റൂമായി ഉപയോഗിക്കുന്നത് പ്രതിഷേധാര്‍ഹമാണെന്ന് എസ്.എഫ്.ഐ.
200ലധികം വിദ്യാര്‍ഥികള്‍ പഠിക്കുന്ന സ്ഥാപനത്തില്‍ 80 ശതമാനത്തിലധികം വിദ്യാര്‍ഥിനികളാണ് ഉള്ളത്. എന്നാല്‍ ഇവര്‍ക്ക് ആവശ്യമായ ശുചിമുറി സൗകര്യം ഇല്ലാത്തത് സ്ഥാപനത്തിന് വലിയ വെല്ലുവിളിയാണ് സൃഷ്ടിക്കുന്നത്. നിലവിലുണ്ടായ ശുചിമുറി യാത്രക്കാര്‍ക്ക് വേണ്ടി വിട്ട് നല്‍കിയതോടെ സാമൂഹ്യ വിരുദ്ധര്‍ സ്ഥാപനത്തിലെ വിദ്യാര്‍ഥിനികളോട് അപമര്യാദയായി പെരുമാറുന്ന പരാതികള്‍ ഉയര്‍ന്ന് വന്നിട്ടുണ്ട്. ശുചിമുറിയില്‍ മദ്യകുപ്പികളും ലഹരി വസ്തുക്കളും ഉള്‍പ്പെടെ കണ്ടെടുത്തിരുന്നു. ഇത് വിദ്യാര്‍ഥികളുടെ സുരക്ഷിതത്വത്തിന് ഭീഷണിയാണ്. നെറ്റ്, ഐ.എ.എസ് കോച്ചിങ് ഉള്‍പ്പെടെ സാധാരണക്കാരായ വിദ്യാര്‍ഥികള്‍ക്ക് സൗജന്യമായി നല്‍കാന്‍ കഴിയുന്ന സ്ഥാപനത്തെ സര്‍ക്കാര്‍ മികച്ച രൂപത്തില്‍ മുന്നോട്ട് കൊണ്ടു പോകുമ്പോഴാണ് സ്ഥാപനത്തിന്റെ സുഗമമായ മുന്നോട്ട് പോക്കിന് സമൂഹ്യ വിരുദ്ധരുടെ പ്രവര്‍ത്തനം തടസമാകുന്നത്.  50 വിദ്യാര്‍ഥികള്‍ പഠിക്കുന്ന സ്ഥാപനത്തിന് സ്വന്തമായി ശുചിമുറി ഉണ്ടാവണം എന്നിരിക്കെ സ്ഥാപനം ഉപയോഗിച്ച് പോന്നിരുന്ന ശുചിമുറി സ്ഥാപനത്തിന് തന്നെ തിരിച്ച് നല്‍കണമെന്നും യാത്രക്കാര്‍ക്കായി ബയോ ടോയ്‌ലറ്റുകളുള്‍പ്പെടെയുള്ള ബദല്‍ സംവിധാനങ്ങള്‍ ഒരുക്കാന്‍ തയാറാവണമെന്നും സ്ഥാപനത്തിന്റെ സുഗമായ നടത്തിപ്പിന് തടസം നില്‍ക്കുന്നവര്‍ക്കെതിരേ പൊലിസും മുനിസിപ്പാലിറ്റിയും നടപടി സ്വീകരിക്കണമെന്നും എസ്.എഫ്.ഐ ജില്ലാ കമ്മിറ്റി പ്രസ്ഥാവനയിലൂടെ ആവശ്യപ്പെട്ടു.