ബാലുശ്ശേരി: സര്‍ക്കിള്‍ പരിധിയില്‍പ്പെട്ട ഒന്‍പത് പഞ്ചായത്തുകളേയും ലഹരിമുക്തമാക്കുന്നതിന്റെ ഭാഗമായി പൂനൂര്‍ മുതല്‍ ഉള്ളിയേരി വരേയും ബാലുശ്ശേരി മുക്ക് മുതല്‍ നന്മണ്ട 12 വരേയും തീര്‍ത്ത മനുഷ്യച്ചങ്ങലയില്‍ ആയിരങ്ങള്‍ കണ്ണികളായി. വിദ്യാര്‍ഥികളും തൊഴിലാളികളും കുടുംബശ്രീ പ്രവര്‍ത്തകരും സാംസ്‌കാരിക സംഘടനാ പ്രവര്‍ത്തകരും ലഹരിക്കെതിരേ പ്രതിജ്ഞയെടുത്തു. വിദ്യാര്‍ഥികളില്‍ ലഹരി ഉപയോഗം വര്‍ധിച്ചു വരുന്ന സാഹചര്യത്തില്‍ ബാലുശ്ശേരി ജനമൈത്രീ പൊലിസാണ് ഓപ്പറേഷന്‍ മുക്തി എന്ന ദൗത്യത്തിന് രൂപം നല്‍കിയത്. ജനങ്ങളുടെ സഹകരണത്തോടെ ലഹരി ഉപയോഗം പൂര്‍ണമായും ഇല്ലാതാക്കുകയെന്നതാണ് ഓപ്പറേഷന്‍ മുക്തിയുടെ ലക്ഷ്യം. വിവിധ കേന്ദ്രങ്ങളില്‍ ഉദ്ഘാടന പരിപാടികള്‍ സംഘടിപ്പിച്ചു. ബാലുശ്ശേരിയില്‍ പുരുഷന്‍ കടലുണ്ടി എം.എല്‍.എ ഉദ്ഘാടകനായിരുന്നു. ഗ്രാമ പഞ്ചായത്ത് പ്രസിഡണ്ട് പി.പി.രവീന്ദ്രനാഥ് അധ്യക്ഷനായി.