പട്‌ന: ബിഹാറില്‍ ഉപേന്ദ്ര കുശ്‌വാഹയ്ക്കു പിന്നാലെ കൂടുതല്‍ സീറ്റ് ആവശ്യവുമായി കേന്ദ്രമന്ത്രി രാംവിലാസ് പസ്വാന്റെ ലോക്ജനശക്തി പാര്‍ട്ടിയും. രാംവിലാസ് പസ്വാനു പകരം മകന്‍ ചിരാഗ് പസ്വാനാണ് ഇന്നലെ ബി.ജെ.പി അധ്യക്ഷന്‍ അമിത് ഷായുമായി കൂടിക്കാഴ്ച നടത്തി പാര്‍ട്ടിക്ക് കൂടുതല്‍ സീറ്റുകള്‍ നല്‍കണമെന്ന് ആവശ്യപ്പെട്ടത്. ധനമന്ത്രി അരുണ്‍ ജെയ്റ്റ്‌ലിയും ചര്‍ച്ചയില്‍ പങ്കെടുത്തു.
മുന്നണിയിലുള്ള ഓരോ പാര്‍ട്ടിക്കും എത്രവീതം സീറ്റുകള്‍ നല്‍കുമെന്ന കാര്യത്തില്‍ അന്തിമ തീരുമാനം ഉണ്ടാക്കണമെന്ന് ചിരാഗ് പസ്വാന്‍ ആവശ്യപ്പെട്ടു. ഈ മാസം അവസാനത്തോടെ വ്യക്തമായ തീരുമാനം ഉണ്ടാകണം. ആറ് ലോക്‌സഭാ സീറ്റുകളില്‍ കുറയാന്‍ പാടില്ല. ഒരു രാജ്യസഭാ സീറ്റ് നല്‍കണമെന്നും കൂടിക്കാഴ്ചയില്‍ എല്‍.ജെ.പി നേതാവ് ആവശ്യപ്പെട്ടിട്ടുണ്ട്. രാമക്ഷേത്ര നിര്‍മാണവുമായി ബന്ധപ്പെട്ട് ഓര്‍ഡിന്‍സ് കൊണ്ടുവരണമെന്ന ആവശ്യത്തെ തള്ളിയ ചിരാഗ് പസ്വാന്‍ , അത്തരമൊരു തീരുമാനം ഒരു പാര്‍ട്ടിയുടെ മാത്രം അജന്‍ഡയാണെന്നും എന്‍.ഡി.എയുടെയോ കേന്ദ്ര സര്‍ക്കാരിന്റെയോ അജന്‍ഡയല്ലെന്നും വ്യക്തമാക്കിയിരുന്നു. മൂന്ന് സംസ്ഥാനങ്ങളില്‍ കോണ്‍ഗ്രസ് അധികാരത്തിലേറിയ സാഹചര്യത്തില്‍ രാംവിലാസ് പസ്വാനും ചിരാഗ് പസ്വാനും രാഹുല്‍ ഗാന്ധിയെ അഭിനന്ദിച്ചിരുന്നു. കോണ്‍ഗ്രസ് വിജയത്തിനുള്ള പൂര്‍ണമായ അംഗീകാരവും രാഹുലിനാണെന്നും ഇരുവരും പറയുകയും ചെയ്തിരുന്നു. ഇതിനുപിന്നാലെയാണ് സീറ്റ് വിഭജനത്തില്‍ അര്‍ഹമായ പ്രാതിനിധ്യം വേണമെന്ന ആവശ്യവുമായി ചിരാഗ് പസ്വാന്‍ ബി.ജെ.പി അധ്യക്ഷനുമായി കൂടിക്കാഴ്ച നടത്തിയത്.