ഫറോക്ക്: ടാങ്കര്‍ ലോറി തൊഴിലാളികളുടെ അനിശ്ചിതകാല സമരം മൂന്നാം ദിവസത്തിലേക്ക് കടന്നതോടെ ഐ.ഒ.സി പമ്പുകളില്‍ ഇന്ധന ക്ഷാമം. നഗരത്തിലെ മിക്ക പമ്പുകളിലും പെട്രോളും ഡീസലും തീര്‍ന്നുതുടങ്ങി. ചിലയിടങ്ങളില്‍ സ്റ്റോക്കുണ്ടെങ്കിലും ഇന്നത്തോടെ അതും തീരുമെന്ന് പമ്പുടമകള്‍ അറിയിച്ചു.
പണിമുടക്ക് തുടര്‍ന്നാല്‍ കോഴിക്കോട്, മലപ്പുറം, വയനാട്, കണ്ണൂര്‍ ജില്ലകളിലെയും ലക്ഷദ്വീപ്, മാഹി എന്നിവിടങ്ങളിലെയും ഐ.ഒ.സി ബങ്കുകളില്‍ ഇന്ധനം കിട്ടാതാകും. അതേസമയം ഡീലര്‍ ലോറികളില്‍ മറ്റു ഡിപ്പോകളില്‍ നിന്നു പമ്പുകളിലേക്ക് ഇന്ധനം എത്തിക്കുന്നതിന് അധികൃതര്‍ ശ്രമം തുടങ്ങിയിട്ടുണ്ട്.
ഇതിന്റെ ഭാഗമായി ഓള്‍ കേരള പെട്രോളിയം-ഡീലര്‍ അസോസിയേഷന്‍ ജില്ലാ പ്രസിഡന്റ് എം.പി അശോകന്റെ നേതൃത്വത്തില്‍ തൊഴിലാളികളുമായി ചര്‍ച്ച നടത്തിയെങ്കിലും ഫലമുണ്ടായില്ല.
സമരം ഒത്തുതീര്‍പ്പാക്കാന്‍ കലക്ടറുടെ സാന്നിധ്യത്തില്‍ ചര്‍ച്ച നടത്തുന്നതിനു നീക്കങ്ങള്‍ നടത്തുന്നുണ്ട്.
തിരുവനന്തപുരത്തുള്ള കലക്ടര്‍ എത്തിയാല്‍ ഇരുകൂട്ടരെയും ചര്‍ച്ചയ്ക്കു ക്ഷണിച്ചേക്കും. ഐ.ഒ.സി ഫറോക്ക് ഡിപ്പോയില്‍ ഇന്ധനം നിറയ്ക്കുന്ന ഫില്ലിങ് പോയിന്റില്‍ സ്ഥാപിച്ച ലോഡിങ് ആം പൈപ്പിന്റെ നീളം കുറയ്ക്കണമെന്നാണ് സമരക്കാരുടെ പ്രധാന ആവശ്യം.