വേങ്ങര: ഊരകം മലയിലെ വിവിധ കരിങ്കല്‍ ക്വാറികളില്‍ റവന്യൂ വകുപ്പ് അധികൃതര്‍ നടത്തിയ പരിശോധനയില്‍ ക്രമക്കേട് കണ്ടെത്തിയ മൂന്നുലോറികള്‍ പിടികൂടി. കണ്ണമംഗലം പഞ്ചായത്ത് ചെരുപ്പടിമലയിലെ പ്രവര്‍ത്തിക്കുന്ന ക്വാറികളിലാണ് കഴിഞ്ഞ ദിവസം തിരൂരങ്ങാടി തഹസില്‍ദാറുടെ നേതൃത്വത്തിലെത്തിയ സംഘം പരിശോധന നടത്തിയത്.
അനധികൃതമായി കരിങ്കല്ല് കടത്തുന്ന മൂന്ന് ലോറികളാണ് പിടിച്ചെടുത്തത്. ഒരു ലോറി അധികൃതരെ വെട്ടിച്ചു കടന്നുപോയി.
കണ്ണമംഗലം പഞ്ചായത്തിലെ വിവിധ ഭാഗങ്ങളില്‍ അനധികൃതമായി കരിങ്കല്‍ ക്വാറികളില്‍ പ്രവര്‍ത്തിക്കുന്നുണ്ടെന്നും കല്ലുകള്‍ കടത്തുന്നുണ്ടെന്നും വിവരം ആര്‍.ഡി.ഒക്ക് ലഭിച്ചിരുന്നു. ആര്‍.ഡി.ഒയുടെ പ്രത്യേക നിര്‍ദ്ദേശപ്രകാരമാണ് സംഘം പരിശോധനക്കെത്തിയത്. എന്നാല്‍, പരിശോധന നടത്തിയ ക്വാറികളില്‍ കല്ല് പൊട്ടിക്കാന്‍ അനുവാദമുണ്ടെങ്കിലും കല്ല് കടത്താന്‍ അനുവാദമില്ല. പരിശോധനയില്‍ പിടികുടിയ മൂന്ന് വാഹനങ്ങള്‍ വേങ്ങര പൊലിസിലേല്‍പ്പിച്ചു.
കൈ കാണിച്ചിട്ടും നിര്‍ത്താതെപോയ വാഹനത്തിനെതിരേ സംഘം പരാതിയും നല്‍കി. തിരൂരങ്ങാടി താഹ്‌സില്‍ദാര്‍ വര്‍ഗീസ് മംഗലം, ഡെപ്യൂട്ടി തഹസില്‍ദാര്‍മാരായ കെ ഷാജു, എം ശ്രീകുമാര്‍, അനീഷ് ചന്ദ്രന്‍, ബി സതീഷ്‌കുമാര്‍ എന്നിവരാണ് പരിശോധനക്കെത്തിയത്.