പരപ്പനങ്ങാടി: വ്യാപാര സ്ഥാപനങ്ങളിലേക്ക് ചരക്കുമായി എത്തുന്ന വലിയ ലോറികള്‍ അഞ്ചപ്പുര അങ്ങാടിയില്‍ ഗതാഗത തടസം സൃഷ്ടിക്കുന്നതായി പരാതി. പല വ്യാപാര സ്ഥാപനങ്ങളുടെയും ഗോഡൗണുകള്‍ അഞ്ചപ്പുര അങ്ങാടിയിലായതിനാല്‍ പയനിങ്ങല്‍ ജങ്ഷന്‍ മുതല്‍ മേല്‍പ്പാല ജങ്ഷന്‍ വരെ ഏതുസമയവും ഗതാഗതക്കുരുക്കാണ്.
ഇതുമൂലം വിദ്യാര്‍ഥികളും ഉദ്യോഗസ്ഥരുമാണ് ഏറെ വലയുന്നത്. ബസുകള്‍ക്ക് സമയം പാലിച്ച് സര്‍വിസ് നടത്താനുമാകുന്നില്ല. ഈ റോഡാകട്ടെ എറണാകുളത്തേക്കുള്ള എളുപ്പ വഴിയായതിനാല്‍ വലിയ തിരക്കുള്ളതായി മാറിയിരിക്കുകയാണ്.
വാഹനങ്ങളുടെ ക്രമാതീതമായ വര്‍ധനവ് കാരണം നഗരത്തിലുണ്ടാകുന്ന ഗതാഗത തടസം ഒഴിവാക്കാന്‍ ഗോഡൗണിലേക്ക് ഇറക്കാന്‍ ചരക്കുമായി എത്തുന്ന വലിയ വാഹനങ്ങളുടെ സമയക്രമം രാത്രി പത്ത് മണിക്ക് ശേഷമോ രാവിലെ ആറിന് മുന്‍പോ ആക്കണമെന്നാണ് നാട്ടുകാരുടെ ആവശ്യം .