ലണ്ടന്‍: ലോക ചാംപ്യന്‍ഷിപ്പിലെ ഇന്ത്യന്‍ പോരാട്ടം അവസാനിച്ചു. പതിവു പോലെ ഇന്ത്യന്‍ സംഘത്തിന് നിരാശ മാത്രം ബാക്കി. ജാവലിന്‍ ത്രോയുടെ ഫൈനലിലേക്ക് അപ്രതീക്ഷിത മുന്നേറ്റം നടത്തിയ ഇന്ത്യന്‍ താരം ദവിന്ദര്‍ സിങ് കാങിന് 12ാം സ്ഥാനം കൊണ്ട് തൃപ്തിപ്പെടേണ്ടി വന്നു. ആദ്യ ശ്രമത്തില്‍ 75.40 മീറ്റര്‍ താണ്ടിയ ദവിന്ദര്‍ രണ്ടാം ശ്രമത്തില്‍ അയോഗ്യനാക്കപ്പെട്ടു. മൂന്നാം ശ്രമത്തില്‍ 80.02 മീറ്റര്‍ താണ്ടി താരം പോരാട്ടം അവസാനിപ്പിച്ചു. 89.89 മീറ്റര്‍ പിന്നിട്ട് ജര്‍മന്‍ താരം ജോന്നസ് വെറ്റര്‍ സ്വര്‍ണവും 89.73 മീറ്റര്‍ താണ്ടി ചെക്ക് റിപ്പബ്ലിക്കിന്റെ യാകുബ് വാഡ്‌ലെജ് വെള്ളിയും നേടി. ചെക്ക് താരം തന്നെയായ പെറ്റര്‍ ഫ്രിഡ്‌റിചിനാണ് വെങ്കലം.