കോഴിക്കോട്: 'ഒരുമയോടെ വസിക്കാം, സൗഹൃദം കാക്കാം' എന്ന സന്ദേശവുമായി എസ്.കെ.എസ്.എസ്.എഫ് സംഘടിപ്പിക്കുന്ന ദേശിയോദ്ഗ്രഥന പ്രചാരണത്തിന്റെ ഭാഗമായി സ്വാതന്ത്ര്യദിനത്തില്‍ സംസ്ഥാനത്തെ 170 കേന്ദ്രങ്ങളില്‍ ഫ്രീഡം സ്‌ക്വയര്‍ സംഘടിപ്പിക്കും.
രാജ്യത്ത് വര്‍ധിച്ച് വരുന്ന വിദ്വേഷ പ്രചരണങ്ങള്‍ക്കെതിരേയും ജനാധിപത്യ മതേതരസംവിധാനങ്ങളെ ദുര്‍ബലപ്പെടുത്താനുള്ള ഫാസിസ്റ്റ് നീക്കങ്ങളെ തുറന്ന് കാണിക്കുകയുമാണ് ഫ്രീഡം സ്‌ക്വയര്‍ ലക്ഷ്യമാക്കുന്നത്. ജനങ്ങളെ ഭിന്നിപ്പിച്ച് ഭരിക്കാനും ചൂഷണം ചെയ്യാനും അധിനിവേശ ശക്തികള്‍ ശ്രമം നടത്തിയപ്പോള്‍ മത ജാതി ചിന്തകള്‍ക്കതീതമായി സ്വാതന്ത്ര്യസമര പോരാട്ടം നടത്തിയ ദേശാഭിമാനികളുടെ പാത പിന്തുടര്‍ന്ന് ഫാസിസത്തെ ചെറുത്ത് തോല്‍പ്പിക്കണമെന്ന സന്ദേശമാണ് ഫ്രീഡം സ്‌ക്വയറിലൂടെ കൈമാറുന്നത്.
വൈകിട്ട് നാല് മണിക്ക് മേഖലാ കേന്ദ്രങ്ങളില്‍ പ്രകടനമായി ആരംഭിച്ച് സമാപന കേന്ദ്രത്തില്‍ പ്രതിജ്ഞ ചൊല്ലി പരിപാടികള്‍ ആരംഭിക്കും. സംഘടനാ പ്രതിനിധികള്‍ക്ക് പുറമേ സാമൂഹിക സാംസ്‌കാരിക രംഗങ്ങളിലെ പ്രമുഖര്‍ ചടങ്ങുകള്‍ക്ക് അഭിവാദ്യം അര്‍പ്പിക്കും.
പരിപാടികള്‍ വന്‍ വിജയമാക്കണമെന്നും പ്രവര്‍ത്തകര്‍ രംഗത്തിറങ്ങണമെന്നും സംസ്ഥാന പ്രസിഡന്റ് സയ്യിദ് ഹമീദലി ശിഹാബ് തങ്ങള്‍ അഭ്യര്‍ഥിച്ചു. വിവിധ ഗള്‍ഫ് രാജ്യങ്ങളിലും എസ്.കെ.എസ്.എസ്. എഫ് കമ്മിറ്റികളുടെ ആഭിമുഖ്യത്തില്‍ സ്വാതന്ത്ര്യദിനത്തില്‍ ഫ്രീഡം സ്‌ക്വയര്‍ സംഘടിപ്പിക്കുന്നുണ്ട്.