വെഞ്ഞാറമൂട്: കാട് കയറി പുതുക്കുളം. തിരിഞ്ഞ് നോക്കാതെ അധികൃതര്‍. വെഞ്ഞാറമൂട് ടൗണിന് ഹൃദയ ഭാഗത്തായുള്ള പഞ്ചായത്ത് വക കുളമാണ് അനാഥാവസ്ഥയില്‍ കാടുകയറി നശിക്കുന്നത്. പതിറ്റാണ്ടുകള്‍ പഴക്കമുള്ള വെഞ്ഞാറമൂട്ടിലെ ജലസംഭരണ കുളങ്ങളിലൊന്നാണ് ഈ കുളം. ഒന്നരദശാബ്ദം മുമ്പ് ലക്ഷങ്ങല്‍ ചിലവഴിച്ച് കുളത്തിന്റെ പാര്‍ശ്വഭിത്തികള്‍ നിര്‍മിച്ച് പഞ്ചായത്ത് കുളത്തിനെ മോടിപിടിപ്പിച്ചെങ്കിലും പിന്നീട് ആരും ഇങ്ങോട്ട് തിരിഞ്ഞ് നോക്കാതായി.
വെഞ്ഞാറമൂട്ടിലെ സ്വകാര്യ ബസ് സ്റ്റാന്റിനായി അക്വയര്‍ ചെയ്തിരിക്കുന്ന സ്ഥലത്തിനോട് ചേര്‍ന്നാണ് കുളം സ്ഥിതി ചെയ്യുന്നത്. സ്വകാര്യ ബസുകള്‍ ഇവിടെ എത്താറില്ല. എന്നാല്‍ പഞ്ചായത്ത് ഇവിടെ രാത്രികാലങ്ങില്‍ മത്സ്യമൊത്ത വില്‍പ്പനക്കാര്‍ക്കുള്ള സംഭരണ വിതണയിടമായാണ് മാറ്റിയിരിക്കുന്ന്. അതിനാല്‍ തന്നെ രാത്രി എത്തുന്ന കച്ചവടക്കാര്‍ മാലിന്യങ്ങള്‍ ഈ കുളത്തിലേക്ക് വലിച്ചെറിയുന്നതും പതിവാണ്. നെല്ലനാട് പഞ്ചായത്തിലെ കുളങ്ങളെ സംരക്ഷിക്കാനുള്ള പദ്ധതികളുമായി അധികൃതര്‍ മുന്നോട്ട് പോകുമ്പോളാണ് പുതുക്കുളത്തിന് അവഗണന നേരിടേണ്ടിവരുന്നത്. കാടും പടരും വളര്‍ന്ന് വെള്ളം വറ്റി നാശോന്‍മുഖമായ ഈ കുളത്തെ സംരക്ഷിക്കുമെന്ന പ്രതീക്ഷയിലാണ് നാട്ടുകാര്‍.