മാഡ്രിഡ്: സ്‌പെയിനിന്റെ എക്കാലത്തേയും മികച്ച ഗോള്‍ സ്‌കോററായ ഡേവിഡ് വിയ വീണ്ടും ദേശീയ ടീമില്‍. ഇറ്റലിക്കും ലെയ്‌ചെന്‍സ്റ്റെയിനുമെതിരായ ലോകകപ്പ് യോഗ്യതാ പോരാട്ടത്തിനുള്ള സ്പാനിഷ് ടീമിലേക്കാണ് 35കാരനായ വെറ്ററന്‍ സ്‌ട്രൈക്കറെ കോച്ച് ജുലന്‍ ലോപ്‌റ്റെഗ്യു തിരികെ വിളിച്ചത്. ഡീഗോ കോസ്റ്റയുടെ അഭാവത്തിലാണ് മൂന്ന് വര്‍ഷത്തെ ഇടവേളയ്ക്ക് ശേഷമുള്ള താരത്തിന്റെ അപ്രതീക്ഷിത മടങ്ങി വരവ്. വിയക്കൊപ്പം എ.സി മിലാന്‍ മധ്യനിര താരം സുസോ നടാടെ സ്പാനിഷ് ടീമില്‍ ഇടം പിടിച്ചിട്ടുണ്ട്.
2014ലെ ലോകകപ്പ് പോരാട്ടത്തിന് ശേഷം അന്താരാഷ്ട്ര ഫുട്‌ബോളില്‍ നിന്ന് വിരമിച്ച വിയ നിലവില്‍ അമേരിക്കന്‍ മേജര്‍ ലീഗ് സോക്കര്‍ ടീം ന്യൂയോര്‍ക്ക് സിറ്റി എഫ്.സിക്കായി കളിക്കുകയാണ്. സ്‌പെയിനിനായി 59 ഗോളുകളാണ് താരം നേടിയിട്ടുള്ളത്.