തേഞ്ഞിപ്പലം: കാഴ്ചയില്ലാത്തവര്‍ക്ക് ഇലകളും പൂക്കളും കായ്കളും പഴങ്ങളും തൊട്ടും മണത്തും അറിയുന്നതിനായുള്ള ഇന്ത്യയിലെ ആദ്യത്തെ പൂന്തോപ്പ ് 'ടച്ച് ആന്റ് ഫീല്‍ ഗാര്‍ഡന്‍ ഫോര്‍ വിഷ്വലി ഇംപയേര്‍ഡ്' കാലിക്കറ്റ് സര്‍വകലാശാലയില്‍ ഉദ്ഘാടനം ചെയ്തു.

കാഴ്ചയില്ലാത്തവര്‍ക്ക് വേണ്ടിയുള്ള പൂന്തോപ്പ് ഉദ്ഘാടനം ചെയ്യുന്ന ചടങ്ങില്‍ സ്വന്തം കണ്ണുകള്‍ മൂടിയാണ് ഉദ്ഘാടകനായ നിയമസഭാ സ്പീക്കറും മറ്റ് വിശിഷ്ടാതിഥികളും പങ്കെടുത്തത്. ലോകത്തിന്റെ മനോഹരമായ കാഴ്ചകളത്രയും നഷ്ടമായവര്‍ അനുഭവിക്കുന്ന അതേ രീതിയില്‍, തൊട്ടും മണത്തും, വിവരങ്ങള്‍ കേട്ടും അനുഭവിക്കുകയെന്ന ലക്ഷ്യത്തോടെയാണ് ഈ രീതിയില്‍ ഉദ്ഘാടനം നടത്തിയത്. വിശ്ഷ്ടാതിഥികള്‍ക്കൊപ്പം കോഴിക്കോട് കൊളത്തറ വികലാംഗ ഹയര്‍ സെക്കന്‍ഡറി സ്‌കൂളിലെ കാഴ്ചയില്ലാത്ത വിദ്യാര്‍ഥികളും, സര്‍വകലാശാലയിലെ കാഴ്ചയില്ലാത്ത ജീവനക്കാരും ഈ അപൂര്‍വമായ ചടങ്ങിന്റെ സാന്നിധ്യമായി. തൊട്ടും മണത്തും അറിയുന്നതിനു പുറമെ റെക്കോര്‍ഡ് ചെയ്ത വിവരണങ്ങളിലൂടെയും അറിയാനുള്ള സൗകര്യവും ഇവിടെയുണ്ട്.

വിവരങ്ങള്‍ ലഭിക്കുകയെന്നത് തീര്‍ത്തും അനായാസമായിക്കഴിഞ്ഞ ആധുനിക ലോകത്ത് വിവരങ്ങളെ ക്രിയാത്മകമായ ഉള്‍ക്കാഴ്ചകളാക്കി മാറ്റി സര്‍ഗാത്മകതയ്ക്ക് ഊര്‍ജംപകരുന്ന പ്രക്രിയയാണ് സര്‍വകലാശാലകള്‍ ലക്ഷ്യമാക്കേണ്ടതെന്ന് ഉദ്ഘാടന പ്രസംഗത്തില്‍ സ്പീക്കര്‍ പി.ശ്രീരാമകൃഷ്ണന്‍ പറഞ്ഞു.

പരിസ്ഥിതി ഓഡിറ്റ്, ജനറല്‍ ഓഡിറ്റ് എന്നിവയുടെ റിപ്പോര്‍ട്ടുകളുടെ പ്രകാശനവും സ്പീക്കര്‍ നിര്‍വഹിച്ചു. പരിസ്ഥിതി റിപ്പോര്‍ട്ട് വൈസ് ചാന്‍സലര്‍ ഡോ. കെ.മുഹമ്മദ് ബഷീറും ജനറല്‍ ഓഡിറ്റ് റിപ്പോര്‍ട്ട് പി.അബ്ദുല്‍ ഹമീദ് എം.എല്‍.എയും ഏറ്റുവാങ്ങി.

ഉണങ്ങിയ വിത്തുകളും പഴങ്ങളും ഉള്‍പ്പെടുന്ന കാര്‍പോളജി വിഭാഗത്തിന്റെ ഉദ്ഘാടനം പി.അബ്ദുല്‍ ഹമീദ് എം.എല്‍.എ നിര്‍വഹിച്ചു.കൂടുതല്‍ പദ്ധതികള്‍ സമര്‍പ്പിച്ചാല്‍ അവ ലഭ്യമാക്കുന്നതിന് പൂര്‍ണ പിന്തുണയും എം.എല്‍.എ വാഗ്ദാനം ചെയ്തു.

ബൊട്ടാണിക്കല്‍ ഗാര്‍ഡനോടനുബന്ധിച്ച് 10 സെന്റ് സ്ഥലത്താണ് ഉദ്യാനം സജ്ജീകരിച്ചിരിക്കുന്നത്. 'ടച്ച് ആന്റ് ഫീല്‍ ഗാര്‍ഡന് 17 ലക്ഷവും കാര്‍പോളജി വിഭാഗത്തിന് എട്ട് ലക്ഷവുമാണ് ചെലവ്. കേന്ദ്രസര്‍ക്കാര്‍ ഫണ്ട് ഉപയോഗിച്ച് ഒരു വര്‍ഷം കൊണ്ടാണ് നിര്‍മാണം പൂര്‍ത്തിയാക്കിയത്.