വളാഞ്ചേരി: സിനിമാ താരം ബിജു മേനോനും കുടുംബവും സഞ്ചരിച്ച കാര്‍ അപകടത്തില്‍പെട്ടു. ദേശീയപാത വളാഞ്ചേരി വട്ടപ്പാറയില്‍ കഴിഞ്ഞ ദിവസം രാത്രിയാണ് അപകടമുണ്ടായത്. തൃശൂര്‍ ഭാഗത്തുനിന്നു കോഴിക്കോട് ഭാഗത്തേക്കു പോകുകയായിരുന്ന മറ്റൊരു കാര്‍ നിയന്ത്രണംവിട്ടു നടന്‍ സഞ്ചരിച്ച കാറിലും മറ്റൊരു വാഹനത്തിലും ഇടിക്കുകയായിരുന്നു.
അപകടത്തില്‍ വാഹനത്തിനു കേടുപാടുകള്‍ പറ്റിയെങ്കിലും നടനും കുടുംബവും പരുക്കേല്‍ക്കാതെ രക്ഷപ്പെട്ടു. വളാഞ്ചേരി പൊലിസും ഹൈവേ പൊലിസും ചേര്‍ന്നു വാഹനങ്ങള്‍ നീക്കംചെയ്തു ഗതാഗതം പുനഃസ്ഥാപിച്ചു. രാത്രി വൈകി നടനും കുടുംബവും മറ്റൊരു വാഹനത്തില്‍ യാത്ര തുടര്‍ന്നു.