മുംബൈ: ദുലീപ് ട്രോഫി ക്രിക്കറ്റ് പോരാട്ടങ്ങള്‍ സെപ്റ്റംബര്‍ ഏഴ് മുതല്‍ 29 വരെ അരങ്ങേറും. ഇന്ത്യ റെഡ്, ഗ്രീന്‍, ബ്ലു ടീമുകള്‍ തമ്മിലാണ് പോരാട്ടം. ഇന്ത്യ ബ്ലു ടീമിനെ സുരേഷ് റെയ്‌നയും ഗ്രീന്‍ ടീമിനെ പാര്‍ഥിവ് പട്ടേലും റെഡ് ടീമിനെ അഭിനവ് മുകുന്ദും നയിക്കും. മലയാളി താരം ബേസില്‍ തമ്പി ഇന്ത്യ റെഡ് ടീമില്‍ ഇടംപിടിച്ചിട്ടുണ്ട്. പരുക്കിനെ തുടര്‍ന്ന് ശ്രീലങ്കക്കെതിരായ ടെസ്റ്റ് ടീമില്‍ നിന്ന് പിന്‍മാറിയ ഓപണര്‍ മുരളി വിജയ് ഒരു ടീമിലും ഉള്‍പ്പെട്ടില്ല.
ഇന്ത്യന്‍ ടീമിലേക്ക് തിരിച്ചെത്താന്‍ കാത്തിരിക്കുന്ന സുരേഷ് റെയ്‌നയ്ക്ക് മത്സരം നിര്‍ണായകമാണ്. 2015 ഒക്ടോബറിന് ശേഷം ഇന്ത്യയുടെ പരിമിത ഓവര്‍ ടീമില്‍ റെയ്‌നയ്ക്ക് ഇടം നേടാന്‍ സാധിച്ചിരുന്നില്ല. റെയ്‌നയെ സംബന്ധിച്ച് ടൂര്‍ണമെന്റിലെ മികച്ച പ്രകടനം വരാനിരിക്കുന്ന ആസ്‌ത്രേലിക്കെതിരായ പോരാട്ടത്തിനുള്ള ഇന്ത്യന്‍ ടീമിലേക്ക് തിരഞ്ഞെടുക്കപ്പടാനുള്ള അവസരമാണ്.