പനമരം: കൂളിവയല്‍ ഡബ്ല്യു.എം.ഒ ഇമാം ഗസ്സാലി ആര്‍ട്‌സ് ആന്‍ഡ് ആന്‍ഡ് സയന്‍സ് കോളജ് തെരഞ്ഞെടുപ്പില്‍ മുഴുവന്‍ സീറ്റും യു.ഡി.എസ്.എഫിന്.
കോളജില്‍ നടന്ന കണ്ണൂര്‍ യൂനിവേഴ്‌സിറ്റി യൂനിയന്‍ തെരഞ്ഞെടുപ്പില്‍ എം.എസ്.എഫ് അഞ്ച് സീറ്റും കെ.എസ്.യു മൂന്ന് സീറ്റും നേടി. തെരഞ്ഞെടുപ്പില്‍ മുഹമ്മദ് റിഷാദ് (ചെയര്‍), ചാന്ദ്‌നി (വൈ.ചെയര്‍), മുഹമ്മദ് സാബിര്‍ സഫര്‍ (സെക്ര), ഫായിസ (ജോ.സെക്ര), യൂനുസ് (യു.യു.സി), മുഹമ്മദ് ആഷിഖ് (ഫൈനാട്‌സ്), സഫീര്‍ (ജന.ക്യാപ്റ്റന്‍), തഹ്‌സിന്‍ അബു (മാഗസിന്‍ എഡിറ്റര്‍) എന്നിവരാണ് വിജയിച്ചത്. വിജയാഹ്ലാദ പ്രകടനത്തിനിടെ എസ്.എഫ്.ഐ എം.എസ്.എഫ് പ്രവര്‍ത്തകര്‍ തമ്മില്‍ നേരിയതോതില്‍ സംഘര്‍ഷമുണ്ടായി. തുടര്‍ന്ന് വന്‍ പൊലിസ് സാന്നിധ്യത്തിലാണ് വിദ്യാര്‍ഥി പ്രകടനം നടന്നത്. ആഹ്ലാദ പ്രകടനത്തിനിടെ ഡി.വൈ.എഫ്.ഐ, എസ്.എഫ്.ഐ പ്രവര്‍ത്തകര്‍ ആക്രമണം നടത്തിയതായി യു.ഡി.എസ്.എഫ് പ്രവര്‍ത്തകര്‍ ആരോപിച്ചു.
സംഘര്‍ഷത്തിനിടെ നിരവധി പൊലിസുകാര്‍ക്കും പരുക്കേറ്റു. സംഘര്‍ഷത്തെ തുടര്‍ന്ന് കാപ്പുഞ്ചാല്‍ കോളജ് ജങ്ഷനില്‍ ഒരു മണിക്കൂറോളം ഗതാഗതം തടസ്സപ്പെട്ടു. ഇരു വിഭാഗവും കല്ലേറ് നടത്തി എന്നാണ് പൊലിസ് പറയുന്നത്. എന്നാല്‍ പൊലിസും എസ്.എഫ്.ഐ ഡി.വൈ.എഫ് പ്രവര്‍ത്തകരും ചേര്‍ന്നാണ് തങ്ങളെ നേരിട്ടതെന്ന് എം.എസ്.എഫ്, കെ.എസ്.യു പ്രവര്‍ത്തകര്‍ ആരോപിച്ചു. പോലിസുദ്യോഗസ്ഥരെ അക്രമിച്ചവര്‍ക്കെതിരേ ജാമ്യമില്ലാ വകുപ്പുകള്‍ പ്രകാരം കേസെടുത്തതായി പൊലിസ് അറിയിച്ചു.