കണ്ണൂര്‍: മഹല്ലുകളിലെ നവോത്ഥാന സദസുകളില്‍ ക്രിയാത്മകമായി ഇടപ്പെട്ടും നിര്‍ദേശങ്ങള്‍ നല്‍കിയും കൗമാര, യൗവന, ശാക്തീകരണം ലക്ഷ്യമാക്കി എസ്.കെ.എസ്.എസ്.എഫ് ജില്ലാ ഇബാദിന്റെ കീഴിലുള്ള വിഫാഖ് കര്‍മമേഖലയില്‍ സജീവമാകുന്നു. അബുദാബി കണ്ണൂര്‍ ജില്ലാ എസ്.കെ.എസ്.എസ്.എഫിന്റെ സാമ്പത്തിക സഹായത്തോടെ ഖാഫിലയെന്ന പേരില്‍ ആഴ്ചകള്‍ തോറും തെരഞ്ഞെടുക്കപ്പെടുന്ന മഹല്ലുകളില്‍ നടക്കുന്ന 24 മണിക്കൂര്‍ നീണ്ടുനില്‍ക്കുന്ന ദഅ്‌വ പോഗ്രാമിന് വിഫാഖിലൂടെ പരിശീലനം ലഭിച്ച പ്രമുഖര്‍ നേതൃത്വം നല്‍കും. അധാര്‍മിതകയുടെയും അസന്‍മാര്‍ഗിക പ്രവര്‍ത്തനങ്ങളുടെയും മാലിന്യമണ്ഡലത്തിലേക്ക് ഈച്ചകളെപ്പോലെ പാഞ്ഞടുക്കുന്ന ആധുനിക യുവതലമുറയെ മന:ശാസ്ത്രപരമായ സമീപനത്തിലൂടെ മാറ്റിയെടുക്കുന്ന വിജയകരമായ പദ്ധതികളാണ് ഖാഫിലയിലൂടെ നടപ്പാക്കുന്നത്. പ്രത്യേക ട്രെയിനിങ് പൂര്‍ത്തിയാക്കിയ വിഫാഖ് അംഗങ്ങളുടെ ജില്ലാസംഗമം തളിപ്പറമ്പ് വ്യാപാരഭവനില്‍ നടന്നു. മുത്തലിബ് ഫൈസിയുടെ അധ്യക്ഷതയില്‍ സയിദ് ശുഹൈബ് തങ്ങള്‍(യു.എ.ഇ) ഉദ്ഘാടനം ചെയ്തു. പ്രബോധന മനസ് എന്ന വിഷയം എസ്.വി മുഹമ്മദലിയും ഖാഫില പദ്ധതി അസ്‌ലം അസ്ഹരി പൊയ്ത്തുംകടവും അവതരിപ്പിച്ചു. ജില്ലാ പ്രസിഡന്റ് അഹമ്മദ് ബഷീര്‍ ഫൈസി മാണിയൂര്‍ സമാപന സന്ദേശം നല്‍കി. സാബിര്‍ മാട്ടൂല്‍, ജലീല്‍ ഹസ്സനി കുപ്പം, സി. ഹസന്‍ ദാരിമി, ഇസ്സുദ്ദീന്‍ പൊതുവാച്ചേരി സംസാരിച്ചു. സിറാജുദ്ദീന്‍ ദാരിമി കക്കാട് പ്രാര്‍ഥന നടത്തി.
ഖാഫില പ്രോഗ്രാം നടത്താന്‍ താത്പര്യമുള്ള മഹല്ല് ഭാരവാഹികള്‍ ബന്ധപ്പെടുക- ഫോണ്‍: 9961414074, 9995044406.