ഇരിട്ടി: ആറളം ഫാമില്‍ തൊഴിലാളികളും ജീവനക്കാരും ഒരാഴ്ചയായി നടത്തിവരുന്ന സമരം ഒത്തുതീര്‍പ്പാക്കാന്‍ ഫാം എം.ഡിയുടെ നേതൃത്വത്തില്‍ നടന്ന ചര്‍ച്ച പരാജയം. സമരത്തിന്റെ രണ്ടാംഘട്ടമെന്ന നിലയില്‍ നിരാഹാരവും തിരുവോണ ദിവസം പട്ടിണി സമരവും നടത്താന്‍ തൊഴിലാളികളും ജീവനക്കാരും തീരുമാനിച്ചു. കഴിഞ്ഞ 24 മുതലാണ് മുടങ്ങിയ ശമ്പളം അനുവദിക്കുക, പ്ലാന്റേഷന്‍ തൊഴിലാളികളെ കാര്‍ഷിക മേഖലയിലെ തൊഴിലാളികളായി അംഗീകരിക്കുക, തുടങ്ങിയ ആവശ്യങ്ങള്‍ ഉന്നയിച്ചു ഫാമിലെ ജീവനക്കാരും തൊഴിലാളികളും അനിശ്ചിതകാല സത്യാഗ്രഹ സമരം ആരംഭിച്ചത്. സമരം ഒരാഴ്ച പിന്നിട്ടിട്ടും പരിഹാരമാവാത്തതിനെ തുടര്‍ന്ന് ഫാം എം.ഡി ടി.കെ വിശ്വനാഥന്‍ നായര്‍ തൊഴിലാളി യൂനിയന്‍ നേതാക്കളുമായി ചര്‍ച്ച നടത്തുകയായിരുന്നു. മുടങ്ങിക്കിടക്കുന്ന ജൂണ്‍ മാസത്തെ ശമ്പളത്തിന്റെ പകുതിയും ഓണം അലവന്‍സും അനുവദിക്കാമെന്ന മാനേജ്‌മെന്റിന്റെ വാഗ്ദാനം തൊഴിലാളി യൂനിയനുകള്‍ തള്ളിക്കളഞ്ഞു. ഓഗസ്റ്റ് മാസത്തെ ശമ്പളമടക്കം രണ്ടര മാസത്തെ ശമ്പളവും ഓണം ബോണസും കിട്ടാതെ സമരം അവസാനിപ്പിക്കില്ലെന്നു തൊഴിലാളി യൂനിയനുകള്‍ നിലപാട് സ്വീകരിക്കുകയായിരുന്നു.
ഫാമില്‍ 21 ജീവനക്കാരും 295 സ്ഥിരം തൊഴിലാളികളും 119 താത്കാലിക തൊഴിലാളികളും അഞ്ച് കരാര്‍ തൊഴിലാളികളുമാണുള്ളത്. ഇവരുടെ ജൂണ്‍ മാസം പകുതിമുതലുള്ള ശമ്പളമാണ് ഇപ്പോള്‍ മുടങ്ങിക്കിടക്കുന്നത്. മറ്റു പല ആവശ്യങ്ങള്‍ക്കും നിരവധി തവണ സമരം നടന്നിരുന്നെങ്കിലും തൊഴിലെടുത്ത കൂലിക്കായി സമരത്തിനിറങ്ങേണ്ടി വരുന്നത് ഫാമില്‍ ആദ്യത്തെ സംഭവമാണ്. സംയുക്ത തൊഴിലാളി യൂനിയനുകള്‍ക്കുവേണ്ടി കെ.കെ ജനാര്‍ദ്ദനന്‍, എന്‍.ഐ സുകുമാരന്‍, ആന്റണി ജേക്കബ്, പി.ജെ ബേബി, പി.കെ രാമചന്ദ്രന്‍ പങ്കെടുത്തു.