ന്യൂഡല്‍ഹി: കേന്ദ്ര മന്ത്രിസഭാ ശനിയാഴ്ച പുനഃസംഘടിപ്പിച്ചേക്കുമെന്ന് റിപ്പോര്‍ട്ട്. മന്ത്രിസഭ പുനഃസംഘടനയ്ക്കു മുന്നോടിയായി എട്ട് കേന്ദ്രമന്ത്രിമാര്‍ ഇന്നലെ ബി.ജെ.പി ദേശീയ അധ്യക്ഷന്‍ അമിത് ഷായുമായി കൂടിക്കാഴ്ച നടത്തി. വിദേശ പര്യടനത്തിനു ശേഷം രാഷ്ട്രപതി രാംനാഥ് കോവിന്ദ് മടങ്ങിയെത്തുന്നതിനും ബ്രിക്‌സ് സമ്മേളനത്തിനായി പ്രധാനമന്ത്രി നരേന്ദ്ര മോദി ചൈനയിലേക്ക് പോകുന്നതിനും മുന്‍പായി മന്ത്രിസഭയില്‍ അഴിച്ചുപണിയുണ്ടാകുമെന്നാണു സൂചന.
പ്രതിരോധ വകുപ്പിന്റെ ചുമതല ഇനിയെത്ര നാള്‍ കൂടി വഹിക്കും എന്ന ചോദ്യത്തിന് ഏറെ നാള്‍ ഉണ്ടാകില്ലെന്നായിരുന്നു കേന്ദ്ര ധനമന്ത്രി അരുണ്‍ െജയ്റ്റ്‌ലി ഇന്നലെ പ്രതികരിച്ചത്. അമിത് ഷാ വിളിച്ചു ചേര്‍ത്ത യോഗത്തില്‍ മന്ത്രിസഭാ പുനഃസംഘടന ചര്‍ച്ച ചെയ്‌തോ എന്ന കാര്യത്തില്‍ മന്ത്രിമാര്‍ കൃത്യമായ ഉത്തരം നല്‍കിയില്ല. ഗുജറാത്ത് തെരഞ്ഞെടുപ്പിനെ കുറിച്ചു സംസാരിക്കുന്നതിനാണ് അമിത് ഷാ യോഗം വിളിച്ചതെന്നാണ് കേന്ദ്രമന്ത്രി നിര്‍മല സീതാരാമന്‍ പറഞ്ഞത്. തുടര്‍ച്ചയായ ട്രെയിന്‍ അപകടങ്ങള്‍ക്കിടെ രാജി വയ്ക്കാനൊരുങ്ങിയ കേന്ദ്ര റയില്‍വേ മന്ത്രി സുരേഷ് പ്രഭുവിനോട് കാത്തിരിക്കാന്‍ മോദി പറഞ്ഞിരുന്നു. ഗുജറാത്തിന്റെ ചുമതലയുള്ള ബി.ജെ.പി നേതാവും രാജ്യസഭാ എംപിയുമായ ഭൂപേന്ദ്ര യാദവ് മന്ത്രിസഭയിലെ പുതുമുഖമായി എത്തുമെന്നാണു വിവരം.
പുനഃസംഘടനയോടെ ഗതാഗത-ഷിപ്പിങ് വകുപ്പു മന്ത്രി നിതിന്‍ ഗഡ്കരിയ്ക്ക് മറ്റുചില സുപ്രധാന വകുപ്പുകള്‍ ലഭിച്ചേക്കുമെന്നാണ് വിവരം. അതിനിടെ എന്‍.ഡി.എ പക്ഷത്തേക്കു ചാഞ്ഞു നില്‍ക്കുന്ന എ.ഐ.എ.ഡി.എം. കെയ്ക്ക് ഒരു കാബിനറ്റ് മന്ത്രി ഉള്‍പ്പെടെ മൂന്നു മന്ത്രിസ്ഥാനം ലഭിക്കുമെന്നും സൂചനയുണ്ട്. എന്‍.ഡി.എയില്‍ ചേര്‍ന്നു നില്‍ക്കുന്ന നിതീഷ്‌കുമാറിന്റെ ജെ.ഡി.യുവിനും രണ്ടു മന്ത്രിസ്ഥാനം ലഭിച്ചേക്കും. നിലവില്‍ കേന്ദ്രമന്ത്രി സ്ഥാനം വഹിക്കുന്ന മുതിര്‍ന്നവരെ ഗവര്‍ണര്‍മാരായി നിയമിക്കാനും നീക്കമുണ്ട്.