ടോക്യോ: ആസ്‌ത്രേലിയയെ മറുപടിയില്ലാത്ത രണ്ട് ഗോളുകള്‍ക്ക് തകര്‍ത്ത് ജപ്പാന്‍ 2018ല്‍ റഷ്യയില്‍ നടക്കാനിരിക്കുന്ന ഫിഫ ലോകകപ്പ് ഫുട്‌ബോളിന് യോഗ്യത സ്വന്തമാക്കി. ഗ്രൂപ്പ് ബിയില്‍ ഒന്നാം സ്ഥാനം സ്വന്തമാക്കിയാണ് ജപ്പാന്‍ സീറ്റുറപ്പാക്കിയത്.
ഇറാന് പിന്നാലെ ഏഷ്യയില്‍ നിന്ന് രണ്ടാമത്തെ ടീമായാണ് ജപ്പാന്‍ ലോക മാമാങ്കത്തിനെത്തുന്നത്. ഇതോടെ ലോകകപ്പിന് യോഗ്യത നേടുന്ന ടീമുകളുടെ എണ്ണം നാലായി. ആതിഥേയരെന്ന നിലയില്‍ റഷ്യ യോഗ്യതാ പോരാട്ടമില്ലാതെ തന്നെ സീറ്റുറപ്പിച്ചപ്പോള്‍ ലാറ്റിനമേരിക്കയില്‍ നിന്ന് മുന്‍ ലോക ചാംപ്യന്‍മാരായ ബ്രസീലാണ് യോഗ്യതാ പോരാട്ടം അതിജീവിച്ച് ആദ്യമായി സീറ്റുറപ്പിച്ചത്. പിന്നാലെ ഏഷ്യയില്‍ നിന്ന് ഇറാനും ഇപ്പോള്‍ ജപ്പാനും തങ്ങളുടെ നില ഭദ്രമാക്കി. ഇത് ആറാം തവണയാണ് ജപ്പാന്‍ ലോകകപ്പ് കളിക്കാനെത്തുന്നത്.
ഇരു പകുതികളിലായി നേടിയ ഗോളുകളാണ് കളിയുടെ ഗതി നിര്‍ണയിച്ചത്. ആദ്യ പകുതി തീരാന്‍ നിമിഷങ്ങള്‍ മാത്രമുള്ളപ്പോള്‍ തകുമ ഒസാനോ ജപ്പാന് ലീഡ് സമ്മാനിച്ചു. കളി തീരാന്‍ എട്ട് മിനുട്ടുകള്‍ മാത്രം അവശേഷിക്കേ യോസുകെ ഇഡെഗുചി ടീമിന്റെ വിജയ ഗോളും വലയിലാക്കി.
തോല്‍വി ആസ്‌ത്രേലിയയുടെ പ്രതീക്ഷകള്‍ക്കേറ്റ കനത്ത പ്രഹരമാണ്. ഗ്രൂപ്പില്‍ മൂന്നാം സ്ഥാനത്തുള്ള അവര്‍ക്ക് അവസാന മത്സരത്തില്‍ തായ്‌ലന്‍ഡിനെ മികച്ച മാര്‍ജിനില്‍ കീഴടക്കിയാല്‍ മാത്രമാണ് നേരിട്ട് യോഗ്യത നേടാനുള്ള അവസരമുള്ളത്.