തൊടുപുഴ: ഇടുക്കി റവന്യൂ ജില്ലയിലെ മികച്ച എയ്ഡഡ് സര്‍ക്കാര്‍ ഹൈസ്‌കൂള്‍ പ്രൈമറി വിഭാഗങ്ങളിലെ മികച്ച പി.ടി.എയ്ക്കുള്ള അവാര്‍ഡുകള്‍ പ്രഖ്യാപിച്ചു. അഞ്ചിന് തൊടുപുഴ ഗവണ്‍മെന്റ് എച്ച്എസ്‌സില്‍ നടക്കുന്ന ചടങ്ങില്‍ പി.ടി.എകള്‍ക്കുള്ള അവാര്‍ഡുകള്‍ സമ്മാനിക്കും.
റവന്യൂ ജില്ലാതലത്തില്‍ സെക്കന്‍ഡറി വിഭാഗത്തില്‍ കല്ലാര്‍ ഗവണ്‍മെന്റ് എച്ച്എസിനാണ് ഒന്നാം സ്ഥാനം. കരിമണ്ണൂര്‍ സെന്റ് ജോസഫ്‌സ് ഹയര്‍ സെക്കന്‍ഡറി സ്‌കൂളിനാണ് രണ്ടാം സ്ഥാനം. പ്രൈമറി തലത്തില്‍ രാജകുമാരി ഹോളി ക്യൂന്‍സ് സ്‌കൂള്‍ ഒന്നാം സ്ഥാനവും പഴയവിടുതി ജി യുപിഎസ് രണ്ടാംസ്ഥാനവും നേടി. ഇരുവിഭാഗത്തിലും ഒന്നാം സ്ഥാനക്കാര്‍ക്ക് 60,000 രൂപ വീതവും രണ്ടാം സ്ഥാനക്കാര്‍ക്ക് 40,000 രൂപ വീതവും ലഭിക്കും. ജില്ലാ ഉപജില്ലാ വിദ്യാഭ്യാസ ഓഫീസ് തലത്തിലും മികച്ച പിടിഎ അവാര്‍ഡിനായി സ്‌കൂളുകളെ തെരഞ്ഞെടുത്തു. കട്ടപ്പന വിദ്യാഭ്യാസജില്ലയില്‍ കല്ലാര്‍ ജിഎച്ച്എസും തൊടുപുഴ വിദ്യാഭ്യാസജില്ലയില്‍ കരിമണ്ണൂര്‍ സെന്റ് ജോസഫ്‌സ് ഹയര്‍ സെക്കന്‍ഡറി സ്‌കൂളുമാണ് ജേതാക്കള്‍. രണ്ട് പിടിഎ കള്‍ക്കും 25,000 രൂപ വീതമാണ് സമ്മാനം.
ഉപജില്ലാതലത്തില്‍ ഒന്നാംസ്ഥാനം നേടിയ സ്‌കൂളുകള്‍
അടിമാലി: പഴയവിടുതി ജിയുപിഎസ്, തൊടുപുഴ: ഡയറ്റ് ലാബ് സ്‌കൂള്‍, മൂന്നാര്‍: മറയൂര്‍ ജിഎല്‍പിഎസ്, അറക്കുളം: തുടങ്ങനാട് എസ്ടിഎല്‍പിഎസ്, നെടുങ്കണ്ടം: രാജകുമാരി എച്ച്ക്യുയുപിഎസ്, പീരുമേട്: മുളംകുന്ന് കെഎഎംഎല്‍പിഎസ്, കട്ടപ്പന: മുരിക്കാശ്ശേരി എസ്എംഎല്‍പിഎസ്. എല്ലാ പിടിഎ കള്‍ക്കും 10,000 രൂപ വീതമാണ് സമ്മാനം.
ജില്ലാ പഞ്ചായത്ത് വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍പേഴ്‌സണ്‍ കുഞ്ഞുമോള്‍ ചാക്കോയുടെ അധ്യക്ഷതയില്‍ വിദ്യാഭ്യാസ ഡപ്യൂട്ടി ഡയറക്ടര്‍, ഡയറ്റ് പ്രിന്‍സിപ്പല്‍, എസ്.എസ്.എ ജില്ലാ പ്രൊജക്ട് ഓഫീസര്‍, ആര്‍.എം.എസ്.എ അസിസ്റ്റന്റ് പ്രൊജക്ട് ഓഫീസര്‍, ജില്ലാ വിദ്യാഭ്യാസ ഓഫീസര്‍മാര്‍ എന്നിവര്‍ അംഗങ്ങളായ സമിതിയാണ് അര്‍ഹരെ കണ്ടെത്തിയത്. അവാര്‍ഡുദാന ചടങ്ങില്‍ ബന്ധപ്പെട്ട എല്ലാ ഹെഡ്മാസ്റ്റര്‍മാരും പിടിഎ പ്രസിഡന്റുമാരും പങ്കെടുക്കണമെന്ന് ജില്ലാ വിദ്യാഭ്യാസ ഉപഡയറക്ടര്‍ അറിയിച്ചു.