മിന: ഹജ്ജിന്റെ പ്രധാന കര്‍മ്മങ്ങളില്‍ ഒന്നായ ഒന്നാം ദിനത്തിലെ കല്ലേറ് കര്‍മ്മം പൂര്‍ത്തിയായി. വളരെ സുഖകരവും ബുദ്ധിമുട്ടുകളൊന്നും കൂടാതെയാണ് കല്ലേറ് കര്‍മ്മം പൂര്‍ത്തിയായത്. കല്ലേറ് കര്‍മ്മം പൂര്‍ത്തിയാക്കിയ ഹാജിമാര്‍ മിനായില്‍ തിരിച്ചെത്തി ടെന്റുകളില്‍ വിശ്രമത്തിലാണ്. കര്‍മങ്ങള്‍ നിര്‍വഹിച്ച് ഇഹ്‌റാമില്‍ നിന്നും ഒഴിവായതോടെ പ്രധാന ചടങ്ങുകള്‍ പൂര്‍ത്തിയായി. ഹജ്ജ് അവസാനിക്കുന്നത് വരെ തീര്‍ഥാടകര്‍ മിനായിലെ തമ്പുകളിലാണ് താമസിക്കുക. ഹാജിമാര്‍ക്ക് ഏറ്റവും തിരക്കേറിയ ദിവസമായിരുന്നു വെള്ളിയാഴ്ച്ച.

വ്യാഴാഴ്ച്ച വൈകുന്നേരത്തോടെ അറഫയില്‍ നിന്നും മുസ്ദലിഫയിലേക്ക് നീങ്ങിയ ഹാജിമാര്‍ വെള്ളിയാഴ്ച പുലര്‍ച്ചെ മിനായില്‍ മടങ്ങിയെത്തി. ഇവിടെ നിന്നും പിശാചിന്റെ പ്രതീകാത്മക സ്തൂപമായ ജംറതുല്‍ അഖബയില്‍ കല്ലെറിഞ്ഞ ശേഷം മക്കയിലെത്തി ഹജ്ജിന്റെ ത്വവാഫ് അഥവാ കഅ്ബാ പ്രദക്ഷിണവും സഫ മര്‍വ്വ കുന്നുകള്‍ക്കിടയില്‍ പ്രയാണവും നടത്തി. ബലികര്‍മം നിര്‍വഹിച്ച് മുടി മുറിച്ച് തീര്‍ഥാടകര്‍ ഹജ്ജിന്റ വേഷത്തില്‍ നിന്നും ഒഴിവായി. ഇനി തുടര്‍ന്നുള്ള മൂന്ന് ദിവസം കൂടി മിനായിലെ തമ്പുകളില്‍ രാപാര്‍ത്ത് മൂന്ന് ജംറകളില്‍ കല്ലേറ് നിര്‍വഹിക്കും. ഇതോടെ ഹജജിന് പരിപൂര്‍ണ്ണ സമാപനമാവും.

കല്ലേറ് കര്‍മ്മം നിര്‍വ്വഹിക്കുന്നിടത് കനത്ത സുരക്ഷാ വലയമാണ് ഒരുക്കിയിരുന്നത്. കൂടാതെ, ഓരോ രാജ്യക്കാര്‍ക്കും ആഭ്യന്തര ഹാജിമാര്‍ക്കും പ്രത്യേക സമയ ക്രമങ്ങളും ഒരുക്കിയിരുന്നു. മുന്‍കാലങ്ങളില്‍ ഇവിടെ ഉണ്ടാകാറുള്ള തിരക്കുകളും അപകടങ്ങളും പാഠമാക്കി ശക്തമായ ഒരുക്കങ്ങളാണ് നടത്തിയിരുന്നത്. ഇതെല്ലം കൊണ്ട് തന്നെയാണ് ഈ വര്‍ഷം കല്ലേറ് കര്‍മ്മം സുഖകരമായി നടക്കാന്‍ കാരണം.