മിന: മക്ക പ്രവിശ്യ ഗവര്‍ണറും സഊദി ഭരണാധികാരി സല്‍മാന്‍ രാജാവിന്റെ ഉപദേഷ്ടാവും സെന്‍ട്രല്‍ ഹജ്ജ് കമ്മിറ്റി ചെയര്‍മാനുമായ പ്രിന്‍സ് ഖാലിദ് അല്‍ ഫൈസല്‍ രാജകുമാരനുമായി ഇന്ത്യന്‍ ഹജ്ജ് സൗഹൃദ സംഘ തലവനും വിദേശ കാര്യ സഹ മന്ത്രിയുമായ എം.ജെ അക്ബര്‍ കൂടിക്കാഴച നടത്തി. മക്ക പ്രവിശ്യ ഡെപ്യൂട്ടി ഗവര്‍ണര്‍ അബ്ദുല്ല ബിന്‍ ബന്ദര്‍ ബിന്‍ അബ്ദുല്‍ അസീസ് രാജകുമാരനും കൂടിക്കാഴ്ചയില്‍ പങ്കു കൊണ്ടു. മിനായിലെ രാജകൊട്ടാരത്തിലായിരുന്നു കൂടിക്കാഴ്ച.
ലോക മുസ്‌ലിംകള്‍ക്കും പ്രത്യേകിച്ചും ഇന്ത്യക്കാര്‍ക്കും സഊദി ഭരണകൂടം ഏര്‍പ്പെടുത്തിയ സൗകര്യങ്ങളില്‍ ഇന്ത്യന്‍ ഹജ്ജ് പ്രതിനിധി സംഘം സന്തോഷവും നന്ദിയും രേഖപ്പെടുത്തി. ഹാജിമാര്‍ക്ക് മികച്ച സേവനങ്ങള്‍ ഏര്‍പ്പെടുത്തുന്നതില്‍ സഊദി ഭരണകൂടത്തെ ഇന്ത്യന്‍ പ്രതിനിധി സംഘം പ്രശംസിക്കുകയും ചെയ്തു.