കൊണ്ടോട്ടി: കരിപ്പൂര്‍ വിമാനത്താവളത്തില്‍ പി.കെ കുഞ്ഞാലിക്കുട്ടിക്ക് നല്‍കിയ സ്വീകരണത്തിനിടെ മാധ്യമപ്രവര്‍ത്തകരെ ആക്രമിച്ച കേസിലെ പ്രതി പിടിയില്‍.
കേസിലെ 23ാം പ്രതിയായ കണ്ണൂര്‍ കൂര്യാട് പൊട്ടേരി വീട്ടില്‍ കുഞ്ഞിമുഹമ്മദ് (56) ആണ് പിടിയിലായത്. 2004ലാണ് കേസിനാസ്പദമായ സംഭവം. ഐസ്‌ക്രീം കേസില്‍ ആരോപണവിധേയനായിരുന്ന കുഞ്ഞാലിക്കുട്ടി ഗള്‍ഫില്‍ നിന്ന് മടങ്ങിയെത്തിയപ്പോള്‍ കരിപ്പൂര്‍ വിമാനത്താവളത്തില്‍ നല്‍കിയ സ്വീകരണത്തിനിടെയാണ് മാധ്യമപ്രവര്‍ത്തകര്‍ക്കുനേരെ ആക്രമണമുണ്ടായത്. കേസില്‍ ജാമ്യത്തിലിറങ്ങിയ ശേഷം ഇയാള്‍ മുങ്ങുകയായിരുന്നുവെന്ന് പൊലിസ് പറഞ്ഞു. തുടര്‍ന്ന് മഞ്ചേരി സെഷന്‍സ് കോടതി ഇയാളെ പിടികിട്ടാപ്പുള്ളിയായി പ്രഖ്യാപിച്ചിരുന്നു. ഇയാള്‍ നാട്ടിലുള്ളതായി രഹസ്യവിവരം ലഭിച്ചതിനെ തുടര്‍ന്ന് പൊലിസ് കണ്ണൂരിലെത്തി ഇയാളെ പിടികൂടുകയായിരുന്നു.