ചൊക്ലി: യുവതിയെ കാറിടിച്ചു വീഴ്ത്തി സ്വര്‍ണവും പണവും കവര്‍ന്നതായി പരാതി. ചൊക്ലി പൊലിസ് സ്റ്റേഷന്‍ പരിധിയിലെ കീഴ്മാടം കുറ്റിയില്‍ പീടികയിലാണ് സംഭവം. പത്തായക്കുന്ന് സൗത്ത് പാട്യത്തെ പീടികപ്പുരയില്‍ ഗീതയെയാണ്(47) കാറിലെത്തിയ സംഘം അക്രമിച്ചത്. ഇന്നലെ രാവിലെ കുറ്റിയില്‍ പീടികയില്‍ റോഡിലൂടെ നടന്നുപോകുകയായിരുന്നു ഗീത. കാറിടിച്ച് ബോധരഹിതയായി റോഡില്‍ വീണ ഗീതയുടെ കൈവശമുണ്ടായിരുന്ന സ്വര്‍ണാഭരണങ്ങളും 10,000 രൂപയും കവര്‍ന്നു. നാട്ടുകാരാണ് ആശുപത്രിയില്‍ എത്തിച്ചത്. സാരമായി പരുക്കേറ്റ ഗീത തലശേരി സ്വകാര്യ ആശുപത്രിയില്‍ ചികിത്സയിലാണ്.
നേരത്തെ യുവതി മേക്കുന്നിലെ വീട്ടുകാര്‍ക്കെതിരേ നല്‍കിയ മാനനഷ്ടക്കേസ് കൂത്തുപറമ്പ് കോടതിയുടെ പരിഗണനയിലാണ്. അടുത്തമാസം വിധി വരാനിരിക്കെ അതേ സംഘം തന്നെയാണ് തനിക്കെതിരേ അക്രമം നടത്തിയതെന്ന് ഗീത പറഞ്ഞു. ചൊക്ലി പൊലിസ് കേസെടുത്ത് അന്വേഷണം ആരംഭിച്ചു. വനിതാ കമ്മിഷനും പരാതി നല്‍കി.