കുമ്പള: വിദേശത്തേയ്ക്കു കടത്തുവാനുള്ള 25 കിലോ പുകയില ഉല്‍പന്നങ്ങളുമായി രണ്ടു പേരെ പൊലിസ് അറസ്റ്റു ചെയ്തു. പൈവളിഗെ ബായാര്‍പദവിലെ ഇബ്രാഹിം (60), മുഹമ്മദ് (45) എന്നിവരെയാണ് എക്‌സൈസ് സംഘം ഇന്നലെ അറസ്റ്റു ചെയ്തത്. പുകയില ഉല്‍പന്നങ്ങളുമായി കാറില്‍ മംഗളൂരു വിമാനത്താവളത്തിലേക്കു പോകവെയാണ് ഇവരെ കുമ്പള എക്‌സൈസ് ഇന്‍സ്‌പെക്ടര്‍ എസ്. ഷിജുവിന്റെ നേതൃത്വത്തിലുള്ള സംഘം ഉപ്പള സോങ്കാളില്‍ വച്ച് അറസ്റ്റു ചെയ്തത്. രണ്ടു ലക്ഷം രൂപ വിലവരുന്ന പാന്‍പരാഗ് അടക്കമുള്ള പുകയില ഉല്‍പന്നങ്ങളും കാറും കസ്റ്റഡിയിലെടുത്തു.
വിദേശയാത്രികരായതിനാല്‍ പ്രതികളെ പിന്നീടു ജാമ്യത്തില്‍വിട്ടു. ബായാര്‍ ഭാഗത്തുനിന്നു ഗള്‍ഫിലേക്കു കഞ്ചാവ് കടത്താന്‍ സാധ്യതയുണ്ടെന്ന രഹസ്യസന്ദേശം കഴിഞ്ഞ ദിവസം വൈകുന്നേരം എക്‌സൈസിനു ലഭിച്ചിരുന്നു. ഇതേ തുടര്‍ന്നു നടത്തിയ പരിശോധനയ്ക്കിടെയാണ് ഉപ്പള സോംങ്കാലില്‍ വച്ചു പുകയില ഉല്‍പന്നങ്ങളുമായി പോവുകയായിരുന്ന കാര്‍ പിടിയിലായത്.
കാറിലുണ്ടായിരുന്നവരുടെ പാസ്‌പോര്‍ട്ട് പരിശോധിച്ചപ്പോള്‍ നിരന്തരമായി വിദേശ രാജ്യങ്ങളിലേക്കു പുകയില ഉല്‍പന്നങ്ങള്‍ കടത്തുന്ന സംഘമാണ് ഇവരെന്ന് എക്‌സൈസിനു വിവരം ലഭിച്ചു. അടുത്ത കാലം വരെ പത്തു ദിവസത്തിലൊരിക്കല്‍ ഇവര്‍ വിദേശയാത്ര നടത്തിയതായി തെളിഞ്ഞു. പരിശോധനയ്ക്ക് എ.ബി അബ്ദുല്ല, നൗഷാദ്, രാജന്‍, സുധീന്ദ്രന്‍, ശ്രീകാന്ത്, സജിത്ത്, മൈക്കിള്‍ എന്നിവര്‍ നേതൃത്വം നല്‍കി.