കാസര്‍ക്കോട്: വീട്ടുമുറ്റത്ത് കളിച്ചുകൊണ്ടിരിക്കുകയായിരുന്ന കുട്ടിയെ കാണാതായി. കുട്ടി പുഴയില്‍ വീണതാണെന്ന സംശയത്തില്‍ നാട്ടുകാരും അഗ്‌നി രക്ഷാ സേനയും പൊലിസും തിരച്ചില്‍ തുടങ്ങി. ചെങ്കള ചേരൂരിലെ കബീര്‍ റുഖ്‌സാന ദമ്പതികളുടെ മകന്‍ ശഅ്ബാനെയാണ് വീട്ടുമുറ്റത്തുനിന്നു കാണാതായത്.

ഉച്ചയ്ക്ക് 2.30 ഓടെയാണ് സംഭവം. വീട്ടുമുറ്റത്ത് കളിച്ചുകൊണ്ടിരിക്കുകയായിരുന്ന ശഅ്ബാനെ പെട്ടെന്ന് കാണാതാവുകയായിരുന്നു. ഇതേ തുടര്‍ന്ന് വീട്ടുകാര്‍ സമീപത്തെ വീടുകളിലും മറ്റുംകുട്ടിയെ അന്വേഷിച്ചെങ്കിലും കണ്ടെത്താന്‍ കഴിഞ്ഞില്ല. ഇതോടെയാണ് കുട്ടി പുഴയില്‍ വീണതായി സംശയമുയര്‍ന്നത്. ഇതോടെ വീട്ടുകാര്‍ വിദ്യാനഗര്‍ പൊലിസില്‍ വിവരമറിയിച്ചതിനെ തുടര്‍ന്ന് പൊലിസും അഗ്‌നിരക്ഷാ ശമന സേനയും സ്ഥലത്തെത്തി പുഴയില്‍ തിരച്ചില്‍ തുടങ്ങി. കുട്ടിയുടെ വീടിനടുത്ത് തന്നെയാണ് പുഴയുള്ളത്. പുഴയില്‍ തിരച്ചില്‍ നടത്തുന്നതോടൊപ്പം പരിസരങ്ങളിലും മറ്റു സ്ഥലങ്ങളിലും കുട്ടിക്കു വേണ്ടിയുള്ള അന്വേഷണം നടത്തുന്നുണ്ട്.