കൊച്ചി: നടിയെ ആക്രമിച്ച കേസില്‍ ദിലീപിനെതിരെ മൊഴി നല്‍കാന്‍ പൊലിസ് തന്നെ പ്രേരിപ്പിച്ചെന്നും സമ്മര്‍ദ്ദത്തിലാക്കിയെന്നും നടന്‍ നാദിര്‍ഷ ആരോപിക്കുന്ന ശബ്ദസന്ദേശം സാമൂഹിക മാധ്യമങ്ങളില്‍ പ്രചരിക്കുന്നു.
നാദിര്‍ഷയുടെ സമാനമായ ശബ്ദത്തിലാണ് വോയിസ് ക്ലിപ്പ്. എന്നാല്‍ ഇത് തന്റെ ശബ്ദമാണോ എന്ന് നാദിര്‍ഷ സ്ഥിരീകരിച്ചിട്ടില്ല. തന്റെ സഹോദരന്‍ സമദിനെ പൊലിസ് ക്ലബില്‍ വിളിച്ചുവരുത്തി ദിലീപിനെതിരെ മൊഴി നല്‍കിയില്ലെങ്കില്‍ നാദിര്‍ഷയെ പ്രതി ചേര്‍ക്കുമെന്ന് പൊലിസ് ഭീഷണിപ്പെടുത്തിയതെന്ന് ഈ ശബ്ദസന്ദേശത്തിലുണ്ട്.
ചേട്ടന്‍ നാദിര്‍ഷയ്ക്ക് എല്ലാം അറിയാം, എല്ലാം മറച്ചുവയ്ക്കുന്നതാണ്. എല്ലാ തെളിവുകളും പൊലിസിന്റെ കൈയിലുണ്ട്. ദിലീപിന് എതിരായ എല്ലാ കാര്യങ്ങളും പറഞ്ഞില്ലെങ്കില്‍ നാദിര്‍ഷയെ ഞങ്ങള്‍ പ്രതി ചേര്‍ക്കും.
സമദ് ചെന്ന് നാദിര്‍ഷയോട് ഇക്കാര്യം പറഞ്ഞ് മനസിലാക്കിക്കൊടുക്കണം. അന്വേഷണ സംഘവുമായുള്ള രഹസ്യകൂടിക്കാഴ്ചയ്ക്ക് അവസരം ഒരുക്കണമെന്നും പൊലിസ് ഉദ്യോഗസ്ഥര്‍ പറഞ്ഞുവെന്നാണ് വോയിസ് ക്ലിപ്പിലുള്ളത്.

വീട്ടമ്മയെ ആക്രമിച്ച് മാല കവര്‍ന്നു

പേരാമ്പ്ര: വീട്ടമ്മയെ ആക്രമിച്ച് മാല കവര്‍ന്നു. പുളിയോട്ട് മുക്കിലെ എടക്കണ്ടി മീത്തല്‍ അലീമയുടെ (50) സ്വര്‍ണ മാലയാണ് കവര്‍ന്നത്. ശനിയാഴ്ച വൈകിട്ട് നാലിന് പുളിയോട്ട്മുക്ക് ഈര്‍ച്ചമില്ലില്‍നിന്ന് വീട്ടമ്മ ഈര്‍ച്ചപ്പൊടി എടുക്കുമ്പോള്‍ ബൈക്കിലെത്തിയ യുവാവ് അക്രമം നടത്തുകയായിരുന്നു. ഓണാഘോഷ പരിപാടിക്ക് കുറച്ച് ഈര്‍ച്ചപ്പൊടി വേണമെന്ന് പറഞ്ഞപ്പോള്‍ അലീമ യുവാവിന് സഞ്ചിയില്‍ പൊടി വാരിക്കൊടുക്കുന്ന സമയത്ത് പുറകില്‍നിന്ന് കഴുത്ത് പിടിച്ച് ഞെരിച്ച് മാല പൊട്ടിച്ച് കടന്നു കളയുകയായിരുന്നു.