മലപ്പുറം: ഗ്രാമീണ മാധ്യമപ്രവര്‍ത്തനത്തിനുള്ള 2016ലെ സ്റ്റേറ്റ്‌സ്മാന്‍ മാധ്യമപുരസ്‌കാരം മംഗളം മലപ്പുറം ജില്ലാ ലേഖകന്‍ വി.പി നിസാറിന്. 16നു കൊല്‍ക്കത്തയില്‍ നടക്കുന്ന ചടങ്ങില്‍ പുരസ്‌കാരം സമ്മാനിക്കും.
കൊല്‍ക്കത്ത ആസ്ഥാനമായി പ്രവര്‍ത്തിക്കുന്ന സ്റ്റേറ്റ്മാന്‍ ദിനപത്രം ഏര്‍പ്പെടുത്തിയതാണ് പുരസ്‌കാരം. മംഗളം ദിനപത്രത്തില്‍ 2016 ഡിസംബര്‍ 27 മുതല്‍ 31വരെ പ്രസിദ്ധീകരിച്ച 'ഊരുകളിലുമുണ്ട് ഉജ്വല രത്‌നങ്ങള്‍' എന്ന വാര്‍ത്താ പരമ്പരയ്ക്കാണ് അവാര്‍ഡ് ലഭിച്ചത്. ഈ വര്‍ഷത്തെ കേരളാ നിയമസഭയുടെ ആര്‍. ശങ്കരനാരായണന്‍ തമ്പി മാധ്യമപുരസ്‌കാരം, സോളിഡാരിറ്റി സംസ്ഥാന മാധ്യമ പുരസ്‌ക്കാരം എന്നിവ ഇതേ പരമ്പരയ്ക്കു ലഭിച്ചിരുന്നു. മലപ്പുറം കോഡൂര്‍ വലിയാട് സ്വദേശി വിളഞ്ഞിപ്പുലാന്‍ അബൂബക്കറിന്റെയും അസ്മാബിയുടെയും മകനാണ്. ഭാര്യ: മുനീറ, മകന്‍. റിഫില്‍ ഷാന്‍.