തിരൂര്‍: കൊടിഞ്ഞി ഫൈസല്‍ വധക്കേസിലെ രണ്ടാം പ്രതിയും ആര്‍.എസ്.എസ് പ്രവര്‍ത്തകനുമായ ആലത്തിയൂര്‍ കുണ്ടില്‍ ബിബിന്‍ (24) കൊല്ലപ്പെട്ട കേസില്‍ രണ്ട് എസ്.ഡി.പി.ഐ - പോപ്പുലര്‍ ഫ്രണ്ട് പ്രവര്‍ത്തകര്‍ കൂടി അറസ്റ്റില്‍.
രണ്ടാം പ്രതി തൃപ്രങ്ങോട് ആലൂക്കല്‍ വീട്ടില്‍ സാബിനൂള്‍ (39), ഒന്‍പതാം പ്രതി പൊന്നാനി പാലപ്പെട്ടി സ്വദേശി കണ്ണാത്ത് സിദ്ദീഖ് (29) എന്നിവരെയാണ് ഡിവൈ.എസ്.പി എം.പി മോഹനചന്ദ്രന്റെ നേതൃത്വത്തിലുള്ള അന്വേഷണ സംഘം അറസ്റ്റ് ചെയ്തത്. അറസ്റ്റിലായ സാബിനൂള്‍ മുന്‍പ് സി.പി.എം പ്രവര്‍ത്തകരെ ആക്രമിച്ച നാല് കേസുകളില്‍ പ്രതിയാണ്.
ജോലിക്കായി വീട്ടില്‍ നിന്നുമിറങ്ങിയ ബിബിനെ മൂന്നു ബൈക്കുകളിലെത്തി കാത്തിരുന്ന ആറംഗ സംഘം ബി.പി അങ്ങാടി പുളിഞ്ചോട്ടില്‍ വച്ച് ആക്രമിക്കുകയായിരുന്നു. ബൈക്കിലെത്തിയ ബിബിനെ സംഘത്തിലെ മൂന്നു പേര്‍ മാരകായുധം ഉപയോഗിച്ച് വെട്ടിവീഴ്ത്തുകയും ബാക്കിയുള്ളവര്‍ കൃത്യത്തിന് ശേഷം ബൈക്ക് ഓടിച്ചുപോകാന്‍ തയാറായി നില്‍ക്കുകയുമായിരുന്നുവെന്ന് അന്വേഷണ സംഘം പറഞ്ഞു.
എസ്.ഡി.പി.ഐ ഭാരവാഹികളായ പെരുന്തല്ലൂര്‍ ആലുക്കല്‍ മുഹമ്മദ് അന്‍വര്‍ (30), പറവണ്ണ കാഞ്ഞിരക്കുറ്റി തലേക്കര വീട്ടില്‍ തുഫൈല്‍ (32) എന്നിവരെ നേരത്തെ അറസ്റ്റ് ചെയ്തിരുന്നു. കേസിലെ മറ്റ് പ്രതികള്‍ കസ്റ്റഡിയിലുള്ളതായാണ് പൊലിസ് നല്‍കുന്ന സൂചന. ഇവരുടെ അറസ്റ്റ് ഉടനുണ്ടായേക്കും.