കോഴിക്കോട്: 22ാമത് സംസ്ഥാന സീനിയര്‍ സോഫ്റ്റ് ബോള്‍ ചാംപ്യന്‍ഷിപ്പ് നാളെ മുതല്‍ ഈ മാസം പത്ത് വരെ ഇ.എം.എസ് സ്റ്റേഡിയത്തില്‍ നടക്കും. 14 ജില്ലകളില്‍ നിന്നുള്ള പുരുഷ, വനിതാ ടീമുകള്‍ അടങ്ങുന്ന 550 കായിക താരങ്ങളും ഒഫിഷ്യലുകളും ചാംപ്യന്‍ഷിപ്പില്‍ പങ്കെടുക്കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. നാളെ വൈകിട്ട് മൂന്നിന് ജില്ലാ സോഫ്റ്റ് ബോള്‍ അസോസിയേഷന്‍ പ്രസിഡന്റ് ടി.സി അഹമ്മദിന്റെ അധ്യക്ഷതയില്‍ എം.കെ രാഘവന്‍ എം.പി ചാംപ്യന്‍ഷിപ്പ് ഉദ്ഘാടനം ചെയ്യും. ജില്ലാ പഞ്ചായത്ത് പ്രസിഡന്റ് ബാബു പറശ്ശേരി മുഖ്യാതിഥിയായിരിക്കും.
ഒക്‌ടോബര്‍ അവസാന വാരം പഞ്ചാബില്‍ നടക്കുന്ന ദേശീയ സീനിയര്‍ സോഫ്റ്റ് ബോള്‍ ചാംപ്യന്‍ഷിപ്പില്‍ പങ്കെടുക്കേണ്ട പുരുഷ, വനിതാ ടീമുകളെ തിരഞ്ഞെടുക്കുന്ന മത്സരം കൂടിയാണിത്. പത്തിന് വൈകിട്ട് നാലിന് കേരളാ സോഫ്റ്റ് ബോള്‍ അസോസിയേഷന്‍ പ്രസിഡന്റ് ജി സ്പര്‍ജന്‍ കുമാര്‍ ഐ.പി.എസിന്റെ അധ്യക്ഷതയില്‍ മേയര്‍ തോട്ടത്തില്‍ രവീന്ദ്രന്‍ സമാപന സമ്മേളനം ഉദ്ഘാടനം ചെയ്യും. വാര്‍ത്താസമ്മേളനത്തില്‍ എ.കെ മുഹമ്മദ് അഷ്‌റഫ്, ടി.എം അബ്ദുറഹ്മാന്‍, എടയത്ത് ശ്രീധരന്‍, കെ.പി വസന്തരാജന്‍ പങ്കെടുത്തു.