തിരൂര്‍: കൊടിഞ്ഞി ഫൈസല്‍ വധക്കേസ് പ്രതിയും ആര്‍.എസ്.എസ് പ്രവര്‍ത്തകനുമായ തിരൂര്‍ ആലത്തിയൂര്‍ കുണ്ടില്‍ ബിബിന്‍ (24) വധക്കേസില്‍ ഒരാള്‍കൂടി അറസ്റ്റില്‍. കേസിലെ പത്താം പ്രതിയും എസ്.ഡി.പി.ഐ പ്രവര്‍ത്തകനുമായ ചങ്ങരംകുളം കോക്കൂരിലെ കോഴിക്കര വളപ്പില്‍ മുഹമ്മദ് ഹസ്സന്‍ (26) ആണ് അറസ്റ്റിലായത്. ചങ്ങരംകുളത്ത് മുഹമ്മദ് ഹസ്സനും മറ്റ് രണ്ട് പേരും ചേര്‍ന്ന് നടത്തിയിരുന്ന ഷാ ടൂര്‍സ് ആന്‍ഡ് ട്രാവല്‍സ് എന്ന സ്ഥാപനത്തിന്റെ പേരിലാണ് ഈ സംഭവത്തിലുള്‍പ്പെട്ട മറ്റൊരു പ്രതിക്ക് സിംകാര്‍ഡ് എടുത്തുകൊടുത്തതെന്ന് പൊലിസ് പറഞ്ഞു. അറസ്റ്റിലായ മുഹമ്മദ് ഹസ്സനെ ചങ്ങരംകുളത്തെ സ്ഥാപനത്തിലെത്തിച്ച് അന്വേഷണ സംഘം ഇന്നലെ തെളിവെടുപ്പ് നടത്തി.കൊലപാതകക്കേസിലെ മുഴുവന്‍ പ്രതികളുടെയും അറസ്റ്റ് ഉടനുണ്ടാകുമെന്ന് തിരൂര്‍ സി.ഐ എം.കെ ഷാജി പറഞ്ഞു.