തൊടുപുഴ: കിഴക്കന്‍ മേഖലയിലെ പ്രധാന റോഡായ കാരിക്കോട്- വെള്ളിയാമറ്റം റോഡ് റീ ടാര്‍ ചെയ്യാന്‍ നടപടിയായി. അഞ്ചുകോടി രൂപ ചെലവിട്ട് കാരിക്കോട് മുതല്‍ ആലക്കോട് ജങ്ഷന്‍ വരെ ആധുനിക നിലവാരത്തില്‍ ടാറിങ് നടത്താന്‍ ടെന്‍ഡര്‍ നടപടിയായിക്കഴിഞ്ഞു. കുണ്ടും കുഴിയുമായി ഗതാഗതയോഗ്യമല്ലാതായ റോഡ് നന്നാക്കാനുള്ള നടപടികള്‍ മഴ മാറിയാല്‍ ആരംഭിക്കുമെന്ന് പൊതുമരാമത്ത് വകുപ്പ് അധികൃതര്‍ അറിയിച്ചു.
തകര്‍ന്ന റോഡിലുടെ ജീവന്‍ പണയം വെച്ചാണ് ഇരുചക്രവാഹനയാത്രക്കാര്‍ സഞ്ചരിച്ചിരുന്നത്. വഴി പരിചയമില്ലാത്ത ഡ്രൈവര്‍മാര്‍ ഓടിക്കുന്ന വാഹനങ്ങള്‍ വന്‍ഗട്ടറുകളില്‍ വീണ് ആക്‌സില്‍ ഒടിയുന്ന സാഹചര്യവും ഉണ്ടായിരുന്നു. ഏറെ വാഹനങ്ങള്‍ സഞ്ചരിക്കുന്ന ഈ റോഡിന്റെ നിര്‍മാണം പൂര്‍ത്തിയാക്കാന്‍ പത്ത് വര്‍ഷങ്ങള്‍ക്കിടെ പല പദ്ധതികളും ഉയര്‍ന്നു വന്നിരുന്നു. എന്നാല്‍, അതൊന്നും പിന്നീട് യാഥാര്‍ഥ്യമായില്ല.
പതിവുപോലെ എല്ലാ വര്‍ഷവും താല്‍ക്കാലിക അറ്റകുറ്റപ്പണി നടത്തിയാണ് അധികൃതര്‍ തടിതപ്പിയിരുന്നത്. എന്നാല്‍, മഴക്കാലമാകുന്നതോടെ റോഡ് തകരും. ഇതായിരുന്നു അവസ്ഥ. ഒരുവര്‍ഷമായി റോഡ് തകര്‍ന്ന് കുഴികള്‍ രൂപപ്പെട്ട നിലയിലായിരുന്നു. ഇതോടെ ഇളംദേശം, പന്നിമറ്റം, കലയന്താനി, വെട്ടിമറ്റം, പൂച്ചപ്ര തുടങ്ങി കിഴക്കന്‍ പ്രദേശത്തേക്കുള്ള യാത്ര ദുരിതമായിരുന്നു.
പൊതുമരാമത്ത് വകുപ്പിന് കീഴിലുള്ള കേരള റോഡ് ഫണ്ട് ബോര്‍ഡിനാണ് നിലവില്‍ ഈ പാതയുടെ നിര്‍മാണ ചുമതല. ചെറുതോണി- കുരുതിക്കളം- വെള്ളിയാമറ്റം വഴി ഈ നിര്‍ദിഷ്ട പാതയുടെ എസ്റ്റിമേറ്റ് പൂര്‍ത്തിയാക്കിയിരുന്നു. റോഡ് നിര്‍മാണത്തിന് 119 കോടി രൂപയോളം അനുവദിക്കുകയും ചെയ്തു. എന്നാല്‍, വളവുകള്‍ നിവര്‍ത്തി റോഡ് വീതികൂട്ടുന്നതിന് സ്ഥലം ഏറ്റെടുക്കുന്നതിനെതിരെ ചിലര്‍ കോടതിയെ സമീപിച്ചതോടെ നിര്‍മാണത്തിന് തടസം നേരിട്ടു. പിന്നീട് ഇപ്പോഴാണ് പൊതുമരാമത്ത് വകുപ്പ് ഇടപെട്ട് ടെന്‍ഡര്‍ നടപടികള്‍ വേഗത്തിലാക്കിയത്.