സുല്‍ത്താന്‍ ബത്തേരി: തരിശ്ഭൂമിയില്‍ കരനെല്‍കൃഷിയിറക്കി സ്‌കൂള്‍ വിദ്യാര്‍ഥികള്‍. സുല്‍ത്താന്‍ ബത്തേരി ഗവ.ടെക്‌നിക്കല്‍ സ്‌കൂള്‍ വിദ്യാര്‍ഥികളാണ് സ്‌കൂള്‍ പരിസരത്തെ രണ്ടര ഏക്കര്‍ തരിശ്ഭൂമിയില്‍ കരനെല്‍കൃഷിയിറക്കിയത്.
മണ്ണിനേയും മനുഷ്യരെയും അടുത്തറിയുന്ന കാര്‍ഷിക സംസ്‌ക്കാരം വിദ്യാര്‍ഥികള്‍ക്ക് പകര്‍ന്ന് നല്‍കുക എന്ന ഉദ്ദ്യേശത്തെടെയാണ് സ്‌കൂള്‍ പരിസരത്ത് കരനെല്‍കൃഷി ഇറക്കിയത്. തരിശായ കാടുമൂടി കിടന്നിരുന്ന രണ്ടര ഏക്കര്‍ ഭൂമിയിലെ കാട് അധ്യാപകരും വിദ്യാര്‍ഥികളും ചേര്‍ന്ന് വെട്ടിതെളിച്ചു. തുടര്‍ന്ന് ട്രാക്ടര്‍ ഉപയോഗിച്ച് ഉഴുത് കൃഷിയിറക്കാന്‍ പാകമാക്കി. ബത്തേരി നഗരസഭയുടേയും കൃഷിഭവന്റെയും സഹായത്തോടെ ഭൂമിയില്‍ വിത്ത് വിതയ്ക്കുകയും ചെയ്തു. ആതിര നെല്‍വിത്താണ് വയലില്‍ വിതച്ചത്. കരനെല്‍കൃഷിയുടെ ഉദ്ഘാടനം നഗരസഭ അധ്യക്ഷന്‍ സി.കെ സഹദേവന്‍ നിര്‍വഹിച്ചു.