തളിപ്പറമ്പ്: പറപ്പൂല്‍ കയ്യംതടത്തില്‍ ഐസ്‌ക്രീം ബോംബുകള്‍ കണ്ടെത്തിയ സ്ഥലം ബോംബ് സ്‌ക്വാഡും ഡോഗ് സ്‌ക്വാഡും തളിപ്പറമ്പ് പൊലിസും പരിശോധിച്ചു. വ്യാഴാഴ്ച വൈകുന്നേരമാണ് കയ്യംതടത്തെ നിര്‍മാണം പൂര്‍ത്തിയാകാത്ത കെട്ടിടത്തില്‍ നിന്ന് രണ്ട് ഐസ്‌ക്രീം ബോംബുകള്‍ കണ്ടെടുത്തത്.
തളിപ്പറമ്പ് പൊലിസ് ബോംബുകള്‍ സുരക്ഷിതമായി സ്റ്റേഷനിലേക്ക് എത്തിക്കുകയും കണ്ണൂരില്‍ നിന്നെത്തിയ ബോംബ് സ്‌ക്വാഡ് ഇന്നലെ രാവിലെ നിര്‍വീര്യമാക്കുകയും ചെയ്തു. ഇത്തരത്തില്‍ നിര്‍മിച്ച ഉഗ്രശേഷിയുളള ബോംബുകള്‍ ആദ്യമായാണ് കണ്ടെത്തുന്നത്. അധികം പഴക്കമില്ലാത്ത ബോംബുകളാണെന്ന് പരിശോധകര്‍ പറഞ്ഞു. വ്യാഴാഴ്ച ബോംബുകള്‍ കണ്ടെത്തിയ സ്ഥലത്തിനു സമീപത്തെ കുറ്റിക്കാട്ടില്‍ നിന്നു ബോംബുകള്‍ സൂക്ഷിച്ചു എന്നു കരുതുന്ന പ്ലാസ്റ്റിക് ബോട്ടില്‍ കണ്ടെടുത്തു. പൊലിസ് പരിശോധന മുന്‍കൂട്ടി കണ്ട് ബോംബുകള്‍ ഇവിടെനിന്നു നീക്കിയതാവാമെന്ന് ബോംബ് സ്‌ക്വാഡ് എസ്.ഐ ടി.വി ശശിധരന്‍ പറഞ്ഞു.