ഇരിട്ടി: മാക്കൂട്ടം ചുരം റോഡില്‍ ലോറി അപകടത്തില്‍പെട്ട് ആറുമണിക്കൂറോളം ഗതാഗതം തടസപ്പെട്ടു. ഇന്നലെ രാവിലെ ഏഴോടെ ആന്ധ്രയില്‍ നിന്നു കണ്ണൂരിലേക്കു അരി കയറ്റിവരികയായിരുന്ന ലോറിയാണ് അപകടത്തില്‍പെട്ടത്. ഇറക്കമിറങ്ങി വരികയായിരുന്ന ലോറി മുന്‍പില്‍ സഞ്ചരിക്കുകയായിരുന്ന മറ്റൊരു ചരക്ക് ലോറിയുടെ പിന്നില്‍ നിയന്ത്രണം വിട്ടു ഇടിക്കുകയായിരുന്നു. ഇരുഭാഗത്തും ഗര്‍ത്തമുള്ള റോഡിന്റെ മദ്ധ്യത്തില്‍ നിന്നുപോയ ലോറി മണിക്കൂറുകളോളം നടത്തിയ ശ്രമത്തിനൊടുവിലാണ് ഇവിടെ നിന്നു മാറ്റാനായത്. നാല് മണിക്കൂറിനു ശേഷം ഭാഗികമായും ആറ് മണിക്കൂറിന് ശേഷം പൂര്‍ണമായും ഗതാഗതം പുനഃസ്ഥാപിച്ചു. അപ്പോഴേക്കും ബസുകള്‍ അടക്കമുള്ള യാത്രാവാഹനങ്ങളുടേയും ചരക്കു വാഹനങ്ങളുടെയും നീണ്ട നിര ചുരം റോഡില്‍ രൂപപ്പെട്ടിരുന്നു. കഴിഞ്ഞ രണ്ടു ദിവസങ്ങളിലായി മാക്കൂട്ടം ചുരം റോഡില്‍ ആറോളം വാഹനങ്ങളാണ് അപകടത്തില്‍പെട്ടത്.