തൃക്കരിപ്പൂര്‍: സെപക് ടാക്‌റോ എന്ന കായിക ഇനത്തിനു ഫുട്‌ബോള്‍ ഗ്രാമമായ തൃക്കരിപ്പൂരിലും സ്വീകാര്യത കൂടുന്നു. ഫുട്‌ബോള്‍ കളിയിലെ സമാനതകളും ഷട്ടില്‍ കോര്‍ട്ടിനു സമാനമായ ചെറിയ കോര്‍ട്ടുമാണ് ഇതിനു പ്രധാന കാരണം. അടുത്തിടെ കേരള സ്‌പോര്‍ട്‌സ് കൗണ്‍സില്‍ ഈ കായികയിനത്തിന് അംഗീകാരം നല്‍കിയതോടെ മറ്റു കായിക ഇനങ്ങള്‍ക്കുള്ള പ്രാധാന്യം സെപക് ടാക്‌റോക്കും ലഭ്യമാകും. നേരത്തെ തന്നെ സ്‌കൂള്‍ ഗെയിംസില്‍ സെപക് ടാക്‌റോ ഉള്‍പ്പെടുത്തി ഗ്രെയിസ് മാര്‍ക്ക് നല്‍കിവരുന്നുണ്ട്. കൂടുതലും പെണ്‍കുട്ടികളാണ് ഈ രംഗത്തുള്ളത്. മൂന്നാം തവണയാണു സംസ്ഥാന ജൂനിയര്‍ ചാംപ്യന്‍ഷിപ്പിനു തൃക്കരിപ്പൂര്‍ ആതിഥേയത്വം വഹിക്കുന്നത്. എ.ഡി 891 കാലഘട്ടത്തില്‍ ഈ കായികയിനം തായ്‌ലാന്റ് മലേഷ്യ, ഫിലിപ്പൈന്‍സ് തുടങ്ങിയ രാജ്യങ്ങളില്‍ കളിച്ചുതുടങ്ങിയെങ്കിലും 1965ലാണു കളി ഇന്ത്യയിലെത്തിയത്. 

1982ല്‍ ഏഷ്യന്‍ ഗെയിംസില്‍ സെപക് ടാക്‌റോ എന്ന കളിയെ പരിചയപ്പെടുത്തി. കളികാണാനിടയായ അന്നത്തെ പ്രധാന മന്ത്രി ഇന്ദിരാഗന്ധി ഈ കായിക ഇനത്തെ പ്രോത്സാഹിപ്പിക്കുകയും ചെയ്തു. ഒളിംപിക് ഗെയിംസ് അതോറിറ്റിയും അംഗികാരം നല്‍കി. ഇന്ത്യന്‍ ആര്‍മിയില്‍ എസ്.എസ്.ബിയില്‍ സെപക്ടാക്‌റോ കളിക്കുന്നവര്‍ക്കു പ്രത്യേക സംവരണമുണ്ട്.
തൃക്കരിപ്പൂരില്‍ ഈ കളിയെ പരിചയപ്പെടുത്തിയത് തൃക്കരിപ്പൂര്‍ സ്വദേശികളും സെപക്ടാക്‌റോ സംസ്ഥാന അസോസിയേഷന്‍ ജനറല്‍ സെക്രട്ടറി കെ.വി ബാബു, വൈസ്പ്രസിഡന്റ് കെ. മധുസൂദനുമാണ്. ഇവര്‍ രണ്ടുപേരും സെപക്ടാക്‌റോ നാഷണല്‍ ലവല്‍ റഫറീസ് കൂടിയാണ്. നാഷണല്‍ ലവല്‍ ചാംപ്യന്‍ഷിപ്പ് തൃക്കരിപ്പൂരില്‍ എത്തിക്കാനുള്ള ശ്രമത്തിലാണ് ബാബുവും മധുവും.