കൊച്ചി: പി.സി. ജോര്‍ജ് എം.എല്‍.എയ്‌ക്കെതിരെ ആക്രമിക്കപ്പെട്ട നടിയുടെ മൊഴി. തനിക്കെതിരായ പരാമര്‍ശം മാനഹാനിയുണ്ടാക്കിയെന്ന് നടി പൊലിസിനു മൊഴി നല്‍കി. കഴിഞ്ഞ വ്യാഴാഴ്ച്ചയാണ് നെടുമ്പാശേരി പൊലിസ് നടിയുടെ വീട്ടിലെത്തി മൊഴി രേഖപ്പെടുത്തിയത്.

സാധാരണക്കാര്‍ക്കിടയില്‍ തന്നെക്കുറിച്ച് സംശയത്തിന് ഇടയാക്കിയെന്നും തനിക്കെതിരായ പ്രചാരണത്തിന് പരാമര്‍ശം ചിലര്‍ ഉപയോഗിച്ചെന്നും നടി പറഞ്ഞു.

അതേസമയം നടിയുടെ മൊഴി പരിശോധിക്കുമെന്ന് പൊലിസ് പറഞ്ഞു. മുഖ്യമന്ത്രി പിണറായി വിജയനു നടി നൽകിയ പരാതിയുടെ അടിസ്ഥാനത്തിലാണ് പി.സി.ജോർജിനെതിരെ പൊലിസ് കേസെടുത്തത്.