ശ്രീനഗര്‍: ജമ്മുകശ്മിരില്‍ ഭീകരാക്രമണത്തില്‍ പൊലിസ് കോണ്‍സ്റ്റബിള്‍ മരിച്ചു. ഇംതിയാസ് അഹമ്മദ് ആണ് മരിച്ചതെന്ന് പൊലിസ് അറിയിച്ചു. ആക്രമണത്തില്‍ ഷബീര്‍ അഹമ്മദ് എന്ന കോണ്‍സ്റ്റബിളിന് പരുക്കേല്‍ക്കുകയും ചെയ്തു. അനന്ദ്‌നാഗ് ജില്ലയില്‍ പൊലിസ് പട്രോളിങ് വാഹനത്തിനുനേരെ നടത്തിയ ആക്രമണത്തിലാണ് പൊലിസ് കോണ്‍സ്റ്റബിള്‍ മരിച്ചത്.
അനന്ദ്‌നാഗ് പട്ടണത്തിലെ ബസ് സ്റ്റാന്റിന് മുന്നില്‍ വച്ചാണ് ഭീകരാക്രമണം ഉണ്ടായത്. അതിനിടയില്‍ ഷോപ്പിയാനിലുണ്ടായ ഏറ്റുമുട്ടലില്‍ രണ്ട് ഭീകരരെ സൈന്യം കൊലപ്പെടുത്തി. വെടിവയ്പില്‍ ഒരു പെണ്‍കുട്ടിക്ക് പരുക്കേറ്റിട്ടുണ്ട്. ഇമാം സാഹിബ്-ബാര്‍ബുഗ് ഗ്രാമത്തിലൂടെ സഞ്ചരിച്ച സൈനിക വാഹനത്തിനുനേരെ ഭീകരര്‍ ആക്രമണം നടത്തിയതിനെത്തുടര്‍ന്നാണ് ഏറ്റുമുട്ടലുണ്ടായത്.