കണ്ണൂര്‍: നടിയെ ആക്രമിച്ച കേസില്‍ ജയിലില്‍ കഴിയുന്ന നടന്‍ ദിലീപിനെ പിന്തുണച്ച് പ്രസ്താവന നടത്തിയതിനു പിന്നാലെ നടന്‍ ശ്രീനിവാസന്റെ വീടിനു നേരെ കരിഓയില്‍ പ്രയോഗം. ശ്രീനിവാസന്റെ കണ്ണൂരിലെ തലശ്ശേരി റോഡിലുള്ള വീടിനു നേരെയാണ് കരിഓയില്‍ പ്രയോഗം. മകന്‍ വിനീത് ശ്രീനിവാസന്റെ പേരിലുള്ള ഈ വീട് കുറച്ചുകാലമായി അടച്ചിട്ടിരിക്കുകയാണ്.

ശനിയാഴ്ച രാത്രിയോ ഞായറാഴ്ച പകലോ ആവാം സംഭവമെന്ന് പൊലിസ് പറഞ്ഞു. വീടിന്റെ ഗെയിറ്റിലും ചുമരിലുമായാണ് കരിഓയില്‍ ഒഴിച്ചിരിക്കുന്നത്. കതിരൂര്‍ പൊലിസ് സ്ഥലത്തെത്തി അന്വേഷണം ആരംഭിച്ചു.

ജയിലില്‍ കഴിയുന്ന നടന്‍ ദിലീപിന് അച്ഛന്റെ ശ്രാദ്ധ ചടങ്ങുകള്‍ക്കായി ജാമ്യം അനുവദിച്ചിരുന്നു. ഇതിനു പിന്നാലെയാണ് വീണ്ടും ദിലീപിന് പിന്തുണയുമായി ശ്രീനിവാസന്‍ രംഗത്തെത്തിയത്. ദിലീപ് തെറ്റ് ചെയ്തതായി വിശ്വസിക്കുന്നില്ലെന്നും ഇത്തരം മണ്ടത്തരങ്ങള്‍ ചെയ്യില്ലെന്നും ശ്രീനിവാസന്‍ പറഞ്ഞിരുന്നു. കാലം ദിലീപിന്റെ നിരപരാധിത്വം തെളിയിക്കുമെന്നുമായിരുന്നു ശ്രീനിവാസന്റെ പരാമര്‍ശം.