തൊടുപുഴ: വൈദ്യുതി ബോര്‍ഡ് അണക്കെട്ടുകളിലെ ജലശേഖരം കഴിഞ്ഞ വര്‍ഷത്തെ നിലയിലെത്തി. തുലാമഴ കൂടി കനിഞ്ഞാല്‍ ഇക്കുറി ജലശേഖരം 70 ശതമാനത്തിലേക്ക് എത്തുമെന്നാണ് വൈദ്യുതി ബോര്‍ഡിന്റെ വിലയിരുത്തല്‍. 2214.45 ദശലക്ഷം യൂനിറ്റ് വൈദ്യുതിക്കുള്ള വെള്ളമാണ് ഇന്നലെ എല്ലാ അണക്കെട്ടുകളിലുമായുള്ളത്. കഴിഞ്ഞ വര്‍ഷം ഇതേ സമയം 2244.91 ദശലക്ഷത്തിനുള്ള വെള്ളമാണ് ഉണ്ടായിരുന്നത്. ഇപ്പോള്‍ അണക്കെട്ടുകളില്‍ ഉള്ളത് മൊത്തം ശേഷിയുടെ 53 ശതമാനം വെള്ളമാണ്.
കഴിഞ്ഞ അഞ്ച് വര്‍ഷത്തെ കണക്ക് പരിശോധിച്ചാല്‍ 2013 ലായിരുന്നു മികച്ച നീരൊഴുക്ക്. 2013ല്‍ ഇതേ ദിവസം 3851.945 ദശലക്ഷം യൂനിറ്റ് വൈദ്യുതിക്കുള്ള വെള്ളമുണ്ടായിരുന്നു. ഏറ്റവും കുറവ് 2012 ലും. അന്ന് 1721.281 ദശലക്ഷം യൂനിറ്റിനുള്ള വെള്ളമാണ് ഉണ്ടായിരുന്നത്. ഏറ്റവും വലിയ പദ്ധതിയായ ഇടുക്കി അണക്കെട്ടിലെ ജലനിരപ്പും കഴിഞ്ഞ വര്‍ഷത്തേതിന്റെ ഒപ്പമെത്തി. 2351.47 അടിയായിരുന്നു ഇന്നലെ രാവിലെ ഇടുക്കിയിലെ ജലനിരപ്പ്.
കഴിഞ്ഞ വര്‍ഷം ഇതേ ദിവസം ഇടുക്കി അണക്കെട്ടില്‍ 2351.56 അടി വെള്ളമാണ് ഉണ്ടായിരുന്നത്. സംഭരണശേഷിയുടെ 47 ശതമാനം വെള്ളമാണ് ഇടുക്കിയില്‍ ഇപ്പോഴുള്ളത്. സാധാരണ തുലാമഴ ഇടുക്കി അണക്കെട്ട് 30 ശതമാനം നിറയ്ക്കാറുണ്ട്. എന്നാല്‍, തുലാമഴ ശക്തമായി ലഭിച്ചാലും ഇക്കുറി ഇടുക്കി അണക്കെട്ട് 70 ശതമാനത്തില്‍ അപ്പുറം പോകില്ലെന്നാണ് കെ.എസ്.ഇ.ബി യുടെ വിലയിരുത്തല്‍.
ഇന്നലെ അണക്കെട്ടുകളുടെ വൃഷ്ടി പ്രദേശങ്ങളില്‍ മഴ കുറവായിരുന്നു. ഒമ്പത് പദ്ധതി പ്രദേശങ്ങളില്‍ ഒരു തുള്ളി മഴ പോലും പെയ്തില്ല. എങ്കിലും നീരൊഴുക്ക് ശക്തമായിരുന്നു. ഇടുക്കി 1.4 മി.മീ, പമ്പ 18, കക്കി 4, ഷോളയാര്‍ 6, ഇടമലയാര്‍ 9, മാട്ടുപ്പെട്ടി 28, പൊരിങ്ങല്‍കുത്ത് 20 മി.മീ എന്നിങ്ങനെയാണ് ഇന്നലെ രാവിലെ ഏഴിന് അവസാനിച്ച 24 മണിക്കൂറില്‍ വിവിധ പദ്ധതി പ്രദേശങ്ങളില്‍ പെയ്ത മഴയുടെ കണക്ക്.
ശക്തമായ മഴ ഇനി അഞ്ച് ദിവസം കൂടി തുടരുമെന്നാണ് കാലാവസ്ഥാ നിരീക്ഷകരുടെ പ്രവചനം. ഇപ്പോള്‍ ലഭിക്കുന്ന മഴ കാലവര്‍ഷം നീണ്ടുപോകുന്നതാണോ അതോ തുലാമഴ നേരത്തെ പെയ്യുന്നതാണോ എന്നത് സംബന്ധിച്ച് അധികൃതര്‍ക്ക് പോലും നിശ്ചയമില്ല. തുലാമഴ നേരത്തെ പെയ്തു തീരുമോ എന്ന ആശങ്കയുമുണ്ട്. ഇക്കുറി ഓഗസ്റ്റ് മാസത്തില്‍ 60 ശതമാനം മഴ അധികം ലഭിച്ചിട്ടുണ്ട്. മൂന്നാഴ്ചയായി മഴ തുടരുന്നതിനാല്‍ വൈദ്യുതി ഉപഭോഗം കുറഞ്ഞുനില്‍ക്കുന്നത് കെ.എസ്.ഇ.ബി ക്ക് നേട്ടമായി.
64.42 ദശലക്ഷം യൂനിറ്റായിരുന്നു ഇന്നലത്തെ സംസ്ഥാനത്തെ ഉപഭോഗം. ഇതില്‍ 21.07 ദശലക്ഷം യൂനിറ്റ് ആഭ്യന്തര ഉല്‍പ്പാദനവും 43.34 ദശലക്ഷം യൂനിറ്റ് കേന്ദ്ര പൂളില്‍ നിന്നുള്ള വൈദ്യുതിയുമായിരുന്നു.