ശ്രീനഗര്‍: ജമ്മുകശ്മിരിലെ കുല്‍ഗ്രാം ജില്ലയില്‍ സൈന്യവുമായുള്ള ഏറ്റുമുട്ടലില്‍ രണ്ട് ഭീകരര്‍ കൊല്ലപ്പെട്ടു. ഹിസ്ബുല്‍ മുജാഹിദീന്‍ ഭീകരരെയാണ് വധിച്ചത്. ഒരു ഭീകരന്‍ സൈന്യത്തിന്റെ പിടിയിലായതായി വിവരമുണ്ട്. ഇവിടെ വൈകിയും ഏറ്റുമുട്ടല്‍ തുടരുകയാണ്.പ്രദേശത്ത് ഹിസ്ബുല്‍ മുജാഹിദീന്‍ ഭീകരര്‍ ഒളിച്ചിരിക്കുന്നുവെന്ന രഹസ്യവിവരത്തെത്തുടര്‍ന്ന് നടത്തിയ തിരച്ചിലിനിടയിലാണ് സൈനികര്‍ക്ക് നേരെ ആക്രമണമുണ്ടായത്. തുടര്‍ന്ന് ശക്തമായ തിരിച്ചടിയിലാണ് രണ്ട് ഭീകരര്‍ കൊല്ലപ്പെട്ടത്. അതേസമയം കുപ്‌വാര ജില്ലയില്‍ നിയന്ത്രണരേഖയ്ക്ക് സമീപമുണ്ടായ സ്‌ഫോടനത്തില്‍ മൂന്ന് സൈനികര്‍ക്ക് പരുക്കേറ്റു. ഇവരെ ജമ്മുവിലെ സൈനിക ആശുപത്രിയില്‍ പ്രവേശിപ്പിച്ചു. സൈനികരുടെ ആരോഗ്യനില തൃപ്തികരമാണെന്ന് ആശുപത്രി അധികൃതര്‍ അറിയിച്ചു.