ബുലന്ദ്ശഹര്‍: സ്‌കൂള്‍ ഫീസ് നല്‍കാന്‍ വൈകിയെന്നാരോപിച്ച് എല്‍.കെ.ജി വിദ്യാര്‍ഥിയെ ക്ലാസ് മുറിയില്‍ പൂട്ടിയിട്ട് സ്‌കൂള്‍ അധികൃതരുടെ ക്രൂരത ബുലന്ദ്ശഹര്‍ അശോക് പബ്ലിക് സ്‌കൂളിലെ എല്‍.കെ.ജി വിദ്യാര്‍ഥിയായ അഭയ് സോളങ്കിയെയാണ് ഫീസ് നല്‍കാത്തതിന്റെ പേരില്‍ അധ്യാപകര്‍ മണിക്കൂറുകളോളം പൂട്ടിയിട്ടത്. കുട്ടിയുടെ ബന്ധുക്കള്‍ നല്‍കിയ പരാതിയുടെ അടിസ്ഥാനത്തില്‍ പൊലിസ് കേസെടുത്തു. അറസ്റ്റ് ഭയന്ന് സ്‌കൂള്‍ ഉടമയും മാനേജരും ഒളിവിലാണ്. ഇവര്‍ക്കായി അന്വേഷണം ഊര്‍ജിതമാക്കിയതായി പൊലിസ് അറിയിച്ചു. സ്‌കൂള്‍ സമയം കഴിഞ്ഞിട്ടും കുട്ടി വീട്ടിലെത്താത്തതിനെതുടര്‍ന്ന് നടത്തിയ അന്വേഷണത്തിലാണ് കുട്ടിയെ ക്ലാസ് മുറിയില്‍ പൂട്ടിയിട്ടതായി കണ്ടെത്തിയത്. ഫീസ് അടച്ചതിനുശേഷമേ കുട്ടിയെ വിട്ടുനല്‍കൂ എന്ന് സ്‌കൂള്‍ അധികൃതര്‍ പറഞ്ഞതായി രക്ഷിതാക്കള്‍ ആരോപിക്കുന്നു.