ചെന്നൈ: എടപ്പാടി പളനിസാമി സര്‍ക്കാരിനെ അട്ടിമറിക്കാന്‍ രാഷ്ട്രീയനീക്കം നടത്തുന്ന ദിനകരപക്ഷത്തിന് കനത്ത തിരിച്ചടി. അണ്ണാ ഡി.എം.കെ ജനറല്‍ കൗണ്‍സില്‍ വിളിക്കുന്നത് നിയമവിരുദ്ധമാണെന്നും ഇത് തടയണമെന്നും ആവശ്യപ്പെട്ട് മദ്രാസ് ഹൈക്കോടതിയില്‍ നല്‍കിയ ഹരജി തള്ളിയതാണ് ദിനകരനും അനുയായികള്‍ക്കും തിരിച്ചടിയായത്.
അതേസമയം ജനറല്‍ കൗണ്‍സില്‍ തടയണമെന്ന ആവശ്യം തള്ളിയ സിംഗിള്‍ ബെഞ്ച് വിധിക്കെതിരേ ചീഫ് ജസ്റ്റിസിന് ഹരജി സമര്‍പ്പിച്ചിരുന്നു. എന്നാല്‍ പ്രശ്‌നത്തില്‍ ഇടപെടാനാകില്ലെന്ന് ചീഫ് ജസ്റ്റിസും വ്യക്തമാക്കി. ഇതോടെ ജനറല്‍ കൗണ്‍സില്‍ ഇന്ന് ചെന്നൈയില്‍ നടക്കും. ശശികല പക്ഷത്തെ പ്രമുഖനും ഓമലൂര്‍ എം.എല്‍.എയുമായ വെട്രിവേലാണ് അണ്ണാ ഡി.എം.കെ ജനറല്‍ കൗണ്‍സില്‍ തടയണമെന്നാവശ്യപ്പെട്ട് ഹൈക്കോടതിയെ സമീപിച്ചിരുന്നത്.
ഹരജി തള്ളിയ സിംഗിള്‍ ബെഞ്ച് പ്രശ്‌നങ്ങളില്‍ ഇടപെടാനാകില്ലെന്നും ഹരജിക്കാരന്‍ തെരഞ്ഞെടുപ്പു കമ്മിഷനെയാണ് സമീപിക്കേണ്ടതെന്നും വ്യക്തമാക്കി. ഇത്തരം അനാവശ്യ കാര്യങ്ങള്‍ക്കായി കോടതിയുടെ സമയം മെനക്കെടുത്തരുതെന്ന് വ്യക്തമാക്കി വെട്രിവേലിന് ഒരു ലക്ഷം രൂപ പിഴയും വിധിച്ചു. ഇതിനെതിരേയാണ് വീണ്ടും ചീഫ് ജസ്റ്റിസിന് പരാതി നല്‍കിയത്. പാര്‍ട്ടി ജനറല്‍ കൗണ്‍സില്‍ യോഗം വിളിക്കാന്‍ ജനറല്‍ സെക്രട്ടറിക്കുമാത്രമേ അധികാരമുള്ളൂ. ഇതിനെതിരായ നീക്കം നിയമവിരുദ്ധമെന്നായിരുന്നു വെട്രിവേലിന്റെ വാദം. പാര്‍ട്ടിയിലെ ഇരുവിഭാഗം തമ്മിലുള്ള തര്‍ക്കം കോടതിയിലെത്തിക്കുകയല്ല വേണ്ടത്. യോഗത്തില്‍ പങ്കെടുക്കാന്‍ താല്‍പര്യമില്ലാത്തവര്‍ക്ക് മാറിനില്‍ക്കാമെന്നും ഹരജി പരിഗണിച്ച ജസ്റ്റിസ് കാര്‍ത്തികേയന്‍ വ്യക്തമാക്കി.
എടപ്പാടി പളനിസാമി സര്‍ക്കാര്‍ ന്യൂനപക്ഷ സര്‍ക്കാരാണെന്ന പ്രതിപക്ഷത്തിന്റെ ആരോപണങ്ങള്‍ നിലനില്‍ക്കെയാണ് പാര്‍ട്ടി ജനറല്‍ കൗണ്‍സില്‍ ഇന്ന് നടക്കുന്നത്. 21 എം.എല്‍.എ മാര്‍ തന്റെ പക്ഷത്തുണ്ടെന്നാണ് ടി.ടി.വി ദിനകരന്റെ വാദം. എന്നാല്‍ കഴിഞ്ഞയാഴ്ച നടന്ന പാര്‍ട്ടി യോഗത്തില്‍ കൂടുതല്‍ എം.എല്‍.എമാര്‍ പങ്കെടുത്തത് എടപ്പാടി പളനിസാമിയുടെ ആത്മവിശ്വാസം വര്‍ധിപ്പിച്ചിട്ടുണ്ട്.
ജനറല്‍ കൗണ്‍സില്‍ വിളിച്ചുചേര്‍ക്കുന്നത് പ്രധാനമായും പാര്‍ട്ടി ജനറല്‍ സെക്രട്ടറി സ്ഥാനത്തു നിന്ന് ശശികലയെ പുറത്താക്കുകയെന്നതിനാണ്. ജനറല്‍ കൗണ്‍സിലില്‍ 1300നും 1400നും ഇടയില്‍ അംഗങ്ങള്‍ പങ്കെടുക്കും. ഇവരില്‍ 85 ശതമാനത്തിന്റെയും പിന്തുണ പളനിസാമി-പനീര്‍ശെല്‍വം പക്ഷത്തിനാണെന്നാണ് അവകാശവാദം.
ജയലളിത അധ്യക്ഷ സ്ഥാനത്തുണ്ടായിരുന്നപ്പോള്‍ വര്‍ഷത്തിലൊരിക്കല്‍ നടന്ന ജനറല്‍ കൗണ്‍സില്‍ യോഗത്തില്‍ മുഴുവന്‍ അംഗങ്ങളും പങ്കെടുക്കാറുണ്ടായിരുന്നു. ഇന്ന് നടക്കുന്ന സമ്മേളനത്തില്‍ പങ്കെടുക്കുന്നതിനായി നേരത്തെ തന്നെ എല്ലാ അംഗങ്ങള്‍ക്കും കത്ത് നല്‍കിയിരുന്നുവെന്ന് പാര്‍ട്ടി വക്താവ് അറിയിച്ചു.