മൊഗാദിഷു: സോമാലിയന്‍ സൈനികതാവളത്തില്‍ ഭീകരവാദികളായ അല്‍ ശബാബ് നടത്തിയ ആക്രമണത്തില്‍ 10 സൈനികര്‍ കൊല്ലപ്പെട്ടു. നിരവധിപേര്‍ക്ക് പരുക്കേറ്റു. അതിര്‍ത്തി നഗരമായ ബലാദ് ഹാവോയില്‍ ഇന്നലെയാണ് ആക്രമണമുണ്ടായത്. സൈനികതാവളത്തിലേക്ക് കാറുമായി എത്തിയ ചാവേര്‍ പൊട്ടിത്തെറിക്കുകയായിരുന്നുവെന്ന് റോയിട്ടേഴ്‌സ് റിപ്പോര്‍ട്ട് ചെയ്തു.
24 സോമാലിയന്‍ സൈനികര്‍ കൊല്ലപ്പെട്ടതായി റെയ്ഡില്‍ വ്യക്തമായിട്ടുണ്ടെന്നും എന്നാല്‍ പത്തുപേര്‍ മരിച്ചെന്നാണ് സൈനികവൃത്തങ്ങള്‍ ഔദ്യോഗികമായി അറിയിച്ചതെന്ന് റോയിട്ടേഴ്‌സ് പ്രതിനിധി പറഞ്ഞു.
ചാവേര്‍ പെട്ടിത്തെറിച്ച ശബ്ദം കേട്ടാണ് രാവിലെ എഴുന്നേറ്റതെന്നും തുടര്‍ന്ന് വ്യാപകമായ വെടിവയ്പ് നടന്നുവെന്നും മേജര്‍ മുഹമ്മദ് അബ്ദുല്ല മാധ്യമങ്ങളോട് പറഞ്ഞു. ഏഴു ഭീകരവാദികളെ കൊലപ്പെടുത്തിയെന്നും ബലാദ് ഹാവോ പിടിച്ചെടുക്കാന്‍ ശ്രമിക്കുന്ന അല്‍ശബാബിനെതിരേ ശക്തമായ പോരാട്ടം നടന്നുകൊണ്ടിരിക്കുകയാണെന്നും അദ്ദേഹം പറഞ്ഞു. അതേസമയം, സൈനിക ആസ്ഥാനവും പൊലിസ് സ്റ്റേഷനും അല്‍ശബാബ് പിടിച്ചെടുത്തുവെന്നും ആക്രമണം നടന്ന നഗരം ഭാഗികമായി അവരുടെ കൈയിലാണെന്നും ഗ്രാമീണര്‍ പറഞ്ഞതായി റോയിട്ടേഴ്‌സ് റിപ്പോര്‍ട്ട് ചെയ്തു.