എടപ്പാള്‍: കോളറാ ബാക്ടീരിയകളെ കണ്ടെത്തിയതിനെ തുടര്‍ന്ന് പരിശോധനക്കായി അയച്ച ജലത്തിന്റെ പരിശോധനാ ഫലം ഒന്നര മാസം പിന്നിട്ടിട്ടും പുറത്ത് വന്നില്ല. ടൗണിലെ 24 കിണറുകളില്‍ നിന്ന് എടുത്ത ജലത്തിന്റെ പരിശോധനാഫലമാണ് ഇതുവരെ പുറത്ത് വരാത്തത്.
കോഴിക്കോട്ടെ ലബോറട്ടറിയില്‍ പരിശോധനാ ഫീസ് അടയ്ക്കാത്തതിനെ തുടര്‍ന്നാണ് പരിശോധനാ ഫലം പുറത്തുവരാത്തതെന്നാണ് സൂചന. കുറ്റിപ്പുറത്തെ കിണറുകളില്‍ കോളറ ബാക്ടീരിയയെ കണ്ടെത്തിയതിനെ തുടര്‍ന്ന് കുറ്റിപ്പുറത്തെ മുഴുവന്‍ കിണറുകളിലെ വെള്ളവും സൗജന്യമായി പരിശോധിക്കുമെന്ന ജില്ലാ ഭരണകൂടത്തിന്റെ പ്രഖ്യാപനത്തെ തുടര്‍ന്നാണ് പരിശോധനക്കായി ജലം ശേഖരിച്ചത്. കുറ്റിപ്പുറത്തെ നാലു കിണറുകളില്‍ 'വിബ്രീയോ കോളറെ' ബാക്ടീരിയകളെ കണ്ടെത്തിയതിനെ തുടര്‍ന്നാണ് ടൗണിലെ മുഴുവന്‍ കിണറുകളിലെ ജലവും പരിശോധിക്കാന്‍ കലക്ടര്‍ ഉത്തരവിറക്കിയത്. ഇത്രയും കിണറുകളിലെ വെള്ളവും പരിശോധിക്കാന്‍ വന്‍തുക ആവശ്യമായി വരുമെന്ന് ആരോഗ്യവകുപ്പ് ചൂണ്ടിക്കാട്ടിയതിനെ തുടര്‍ന്ന് കുറ്റിപ്പുറത്തെ കിണറുകളെ വെള്ളം സൗജന്യമായി പരിശോധിച്ച് നല്‍കാന്‍ കലക്ടര്‍ അമിത് മീണ നിര്‍ദേശിച്ചിരുന്നു. ഇതനുസരിച്ചാണ് ആദ്യഘട്ടമെന്നോണം 24 കിണറുകളിലെ വെള്ളം ശേഖരിച്ച് പരിശോധനക്ക് അയച്ചത്.
ഈ ഫലം ലഭിച്ച ശേഷം വിവിധ ഘട്ടങ്ങളിലായി മറ്റ് കിണറുകളിലെ ജലം പരിശോധനക്കയക്കാമെന്നാണ് തീരുമാനിച്ചിരുന്നത്. സൗജന്യ പരിശോധനയ്ക്കുള്ള ഉത്തരവ് രേഖാമൂലം ഇറക്കാത്തതാണ് പരിശോധന പൂര്‍ത്തിയായിട്ടും ഫീസ് നല്‍കാത്തതിനെ തുടര്‍ന്ന് ഫലം പുറത്ത് വിടാത്ത തെന്നാണ് അറിയുന്നത്. ഫലം കൃത്യമായി വരാത്തതിനാലും മറ്റ് കിണറുകളിലെ ജലം പരിശോധനക്ക് നല്‍കാന്‍ കഴിയാത്തതിനാലും നേരത്തെ കണ്ടെത്തിയ നാല് കിണറുകള്‍ക്ക് പുറമെ മറ്റേതെങ്കിലും കിണറില്‍ ബാക്ടീരിയാ സാന്നിധ്യമുണ്ടോ എന്ന് കണ്ടെത്താന്‍ ആരോഗ്യവകുപ്പിനും സാധിക്കുന്നില്ല.