തെല്‍അവീവ്: 15 വയസ്സ് മാത്രം പ്രായമായ ഫലസ്തീന്‍ ബാലന് 18 വര്‍ഷം തടവ് ശിക്ഷ വിധിച്ച് ഇസ്‌റാഈല്‍ കോടതി. വെസ്റ്റ് ബാങ്കില്‍ നടന്ന ഒരു ആക്രമണത്തില്‍ പങ്കുണ്ടെന്ന് ആരോപിച്ചാണ് നടപടി.  15കാരനായ മുഹമ്മദ് ബാസില്‍ സല്‍ബാനിയെയാണ് ജറൂസലം ജില്ലാ കോടതി ശിക്ഷിച്ചത്. തടവ് ശിക്ഷ കൂടാതെ 300,000 ഷെക്കല്‍ (72.31 ലക്ഷം ഇന്ത്യന്‍ രൂപ) പിഴയും കുട്ടിക്ക് മേല്‍ ചുമത്തിയിട്ടുണ്ട്. അന്യായമായും അനധികൃതമായും ഇസ്‌റാഈല്‍ തടവിലിട്ട ഫലസ്തീനികളുടെ വിഷയം കൈകാര്യം ചെയ്യുന്ന ഫലസ്തീനിയന്‍ പ്രിസണര്‍ സൊസൈറ്റി ഇക്കാര്യം സ്ഥിരീകരിച്ചു.

ഫെബ്രുവരി 2023നാണ് 13ാം വയസ്സില്‍ മുഹമ്മദ് ബാസില്‍ സല്‍ബാനിയെ ഇസ്‌റാഈല്‍ അറസ്റ്റ് ചെയ്തത്. രണ്ട് വര്‍ഷം തടവിലിട്ടാണ് കോടതി വിചാരണാ പ്രഹസനം പൂര്‍ത്തിയാക്കിയത്. ഇസ്‌റാഈല്‍ അധിനിവേശ സൈന്യത്തിന്റെ ആക്രമണത്തെ ചെറുത്തുവെന്ന പേരിലായിരുന്നു അറസ്റ്റ്. പിന്നാലെ, കുട്ടിയുടെ കുടുംബത്തിന്റെ വീടും ഇസ്‌റാഈല്‍ തകര്‍ത്തു. 2023ല്‍ ഷുഫാത്ത് ക്യാംപിലെ ചെക്ക് പോയിന്റില്‍ ഇസ്‌റാഈലി സൈനികന്‍ കൊല്ലപ്പെട്ട കേസിലാണ് സല്‍ബാനിയെ പ്രതിചേര്‍ത്തത്. ജറുസലേമിന് കിഴക്കുള്ള ഷുഫാത്ത് അഭയാര്‍ഥി ക്യാംപിലാണ് മുഹമ്മദ് ബാസില്‍ സല്‍ബാനിയും കുടുംബവും കഴിഞ്ഞിരുന്നത്. 

1,115 കുട്ടികള്‍ ഉള്‍പ്പെടെ കുറഞ്ഞത് 14,500 ഫലസ്തീനികളെങ്കിലും നിലവില്‍ ഇസ്‌റാഈല്‍ ജയിലുകളില്‍ കഴിയുന്നുണ്ടെന്ന് സൊസൈറ്റി പുറത്തുവിട്ട കണക്കുകളില്‍ പറയുന്നു. 2023 ഒക്ടോബര്‍ ഏഴിന് ഗസ്സ വംശഹത്യ ആരംഭിച്ചശേഷം ഇസ്‌റാഈല്‍ സൈന്യത്തിന്റെയും അനധികൃത ജൂത കുടിയേറ്റക്കാരുടെയും ആക്രമണങ്ങളില്‍ കുറഞ്ഞത് 915 ഫലസ്തീനികള്‍ വെസ്റ്റ് ബാങ്കില്‍ മാത്രം കൊല്ലപ്പെട്ടിട്ടുണ്ട്. 7,000 ത്തോളം പേര്‍ക്ക് പരുക്കേറ്റതായും ആരോഗ്യ മന്ത്രാലയം അറിയിക്കുന്നു. ഗസ്സ വെടിനിര്‍ത്തല്‍ പ്രഖ്യാപിച്ച ശേഷം അധിനിവേശ വെസ്റ്റ് ബാങ്കിലുടനീളം ഇസ്‌റാഈല്‍ കനത്ത ആക്രമണം അഴിച്ചു വിടുകയാണ്.