കൊണ്ടോട്ടി: പുളിക്കല്‍ പഞ്ചായത്തിലെ ഒളവട്ടൂര്‍ ചെറുതൊടിപ്പുറായിയില്‍ ഇടിമിന്നലില്‍ മൂന്ന് ആടുകള്‍ ചത്തു. വീട് ഭാഗമായി തകര്‍ന്നു. ഇന്നലെ പുലര്‍ച്ചെയുണ്ടായ ശക്തമായ ഇടിമിന്നലിലാണ് ഒളവട്ടൂര്‍ ചെറുതൊടിപ്പുറായി കൊറ്റിക്കുട്ടിയുടെ മൂന്ന് ആടുകള്‍ ചത്തത്. വീടിന്റെ വയറിങ് പൂര്‍ണമായി കത്തി നശിച്ചു. ചുമരുകള്‍ക്ക് വിള്ളലേറ്റിട്ടുമുണ്ട്. വീട്ടുകാര്‍ അല്‍ഭുതകരമായി രക്ഷപ്പെട്ടു.പുളിക്കല്‍ വില്ലേജിലും പഞ്ചായത്ത് മൃഗ സംരക്ഷണ വകുപ്പിലും പരാതി നല്‍കി. കഴിഞ്ഞ വര്‍ഷവും ഈ പരിസരത്തെ മറ്റൊരു വീട്ടിലെ പശു ഇടിമിന്നലേറ്റ് ചത്തിരുന്നു.
എടവണ്ണപ്പാറ: ഇന്നലെ രാവിലെയുണ്ടായ ശക്തമായ ഇടിയിലും മഴയിലും വീടിന് വിള്ളലുണ്ടാകുകയും വീട്ടുപകരണങ്ങളും വയറിങ്ങും കത്തി നശിക്കുകയും ചെയ്തു.വാഴക്കാട് ചെറുവായൂര്‍ പൊറ്റമ്മല്‍ മുഹമ്മദ് എന്ന കുഞ്ഞുവിന്റെ വീടാണ് തകര്‍ന്ന് നാശ നഷ്ടങ്ങള്‍ ഉണ്ടായത്. ഇടിയുടെ ആഘാതത്തില്‍ മേല്‍ക്കൂരകള്‍ തകര്‍ന്ന് വീഴുകയും, ചുമരിന്റെ പല ഭാഗങ്ങളും അടര്‍ന്ന് വീണും വിള്ളല്‍ വീണും നശിക്കുകയും ചെയ്തിട്ടുണ്ട്. വയറിങ്ങും ഇന്‍വര്‍ട്ടറും വീട്ടുപകരണങ്ങളും പൂര്‍ണമായും നശിച്ചു.തൊഴുത്തിനും കേടുപാടുകള്‍ സംഭവിച്ചു. സമീപ പ്രദേശങ്ങളിലെ വീടുകളിലും നാശനഷ്ടങ്ങള്‍ സംഭവിച്ചിട്ടുണ്ട്.