മലപ്പുറം: കോട്ടപ്പടിയിലെ ക്ലാസ്മുറിയില്‍നിന്നു പടിയിറക്കപ്പെട്ട മലപ്പുറം ഗവ. വനിതാ കോളജ് വിദ്യാര്‍ഥികള്‍ ഇന്നു മുണ്ടുപറമ്പിലെ പീടികമുറിയില്‍ കുടിയിരിക്കും. കോട്ടപ്പടി ഗവ. ബോയ്‌സ് ഹൈസ്‌കൂളിന്റെ പൊളിക്കാനിട്ടിരുന്ന കെട്ടിടത്തില്‍ പ്രവര്‍ത്തിച്ചിരുന്ന കോളജിന്റെ പ്രവര്‍ത്തനമാണ് ഇനിമുതല്‍ മലപ്പുറം ഗവ. കോളജിനു സമീപമുള്ള മുണ്ടുപറമ്പിലെ വാടകക്കെട്ടിടത്തിലേക്കു മാറ്റിയിരിക്കുന്നത്.
ഓണാവധിക്കു ശേഷം ക്ലാസുകള്‍ നാളെയാണ് ആരംഭിക്കുക. ക്ലാസ്മുറിയിലേക്കാവശ്യമായ ബെഞ്ച്, ഡെസ്‌ക്, മറ്റു പഠനോപകരണങ്ങള്‍ എന്നിവ ഇന്നലയോടെ മുണ്ടുപറമ്പിലെ വാടകക്കെട്ടിടത്തിലേക്കു മാറ്റി. പ്രവര്‍ത്തനം തുടങ്ങി മൂന്നാം വര്‍ഷത്തിലേക്കു കടന്നെങ്കിലും സ്വന്തമായി കെട്ടിടമില്ലാത്തതു കോളജിന്റെ പ്രവര്‍ത്തനത്തെ ബാധിച്ചിരുന്നു. രണ്ടു വര്‍ഷം കോളജ് പ്രവര്‍ത്തിച്ച ബോയ്‌സ് ഹൈസ്‌കൂളിലെ പഴയ കെട്ടിടം ഒഴിഞ്ഞുതരണമെന്നു സ്‌കൂള്‍ അധികൃതര്‍ നേരത്തെ ആവശ്യപ്പെട്ടിരുന്നു.
പഴയ കെട്ടിടം പൊളിച്ച് അനുമതിയായ പുതിയ സ്‌കൂള്‍ കെട്ടിടം നിര്‍മിക്കുന്നതിനാണ് പുതിയ തീരുമാനം. ഇതിനായാണ് താല്‍ക്കാലകാടിസ്ഥാനത്തില്‍ രണ്ടു വര്‍ഷത്തിലധികമായി പ്രവര്‍ത്തിച്ചുവരുന്ന ഗവ. വനിതാ കോളജ് ബോയ്‌സ് സ്‌കൂളില്‍നിന്നു മാറ്റുന്നത്.
ഗവ. വനിതാ കോളജില്‍ മൂന്നാം വര്‍ഷ ഡിഗ്രി ക്ലാസുകള്‍കൂടി ആരംഭിച്ചതോടെ വിദ്യാര്‍ഥികള്‍ക്ക് ഇരിക്കാന്‍ ക്ലാസ് മുറികള്‍ ഇല്ലാത്ത അവസ്ഥയുമുണ്ടായി. ഇതോടെയാണ് കോളജ് വാടകക്കെട്ടിടത്തിലേക്ക് മാറ്റാന്‍ തീരുമാനിച്ചത്.
ഗവ. വനിതാ കോളജിനു സ്ഥിരം കെട്ടിടം പണിയാന്‍ ഇന്‍കെല്‍ എജ്യൂസിറ്റിയിലെ അഞ്ചേക്കര്‍ ഭൂമി കഴിഞ്ഞ സര്‍ക്കാര്‍ വിട്ടുനല്‍കിയിരുന്നു. ഇതിന്റെ തുടര്‍നടപടികള്‍ വൈകുന്നതാണ് മലപ്പുറത്തെ ഗവ. വനിതാ കോളജിനു സ്ഥിരം കെട്ടിടം നിര്‍മിക്കുന്നതു നീളാന്‍ കാരണം.