നെടുമ്പാശ്ശേരി: സംസ്ഥാന ഹജ്ജ് കമ്മിറ്റിയുടെ നേതൃത്വത്തില്‍ ഈ വര്‍ഷത്തെ ഹജ്ജ് കര്‍മം നിര്‍വഹിച്ച് മടങ്ങിയെത്തുന്ന ഹാജിമാരെ സ്വീകരിക്കാന്‍ നെടുമ്പാശ്ശേരി അന്താരാഷ്ട്ര വിമാനത്താവളത്തില്‍ പ്രത്യേക സൗകര്യം ഒരുക്കും. ഈ മാസം 20 മുതലാണ് കേരളത്തില്‍ നിന്നുള്ള ഹാജിമാര്‍ മദീന വിമാനത്താവളത്തില്‍ നിന്നും നാട്ടിലേക്ക് മടങ്ങുന്നത്. 20ന് സഊദി സമയം രാത്രി 10.10 ന് ആദ്യ സംഘം ഹാജിമാരുമായി മദീന വിമാനത്താവളത്തില്‍ നിന്നും യാത്ര തിരിക്കുന്ന സഊദി എയര്‍ലൈന്‍സ് വിമാനം 21 ന് പുലര്‍ച്ചെ 5.45 ന് നെടുമ്പാശ്ശേരിയിലെത്തും. 39 സര്‍വീസുകളാണ് ഹാജിമാരുടെ മടക്കയാത്രക്കായി സഊദി എയര്‍ലൈന്‍സ് ചാര്‍ട്ട് ചെയ്തിരിക്കുന്നത്. 38 വിമാനങ്ങളില്‍ 300 പേര്‍ വീതവും,അവസാന വിമാനത്തില്‍ 407 പേരുമാണ് ഉണ്ടാകുക. കേരളത്തില്‍ നിന്നുള്ള 11470 പേരും, ലക്ഷദ്വീപില്‍ നിന്നുള്ള 305 പേരും,മാഹിയില്‍ നിന്നുള്ള 32 പേരും ഉള്‍പ്പെടെ 11807 പേരാണ് നെടുമ്പാശ്ശേരിയില്‍ നിന്നും ഹജ്ജ് കമ്മിറ്റിയുടെ നേതൃത്വത്തില്‍ ഈ വര്‍ഷത്തെ ഹജ്ജ് കര്‍മ്മത്തില്‍ പങ്കെടുക്കാന്‍ യാത്രയായത്. ഇവരോടൊപ്പം രണ്ട് വയസ്സില്‍ താഴെ പ്രായമുള്ള 23 കുട്ടികളും യാത്രയായിട്ടുണ്ട്.
നെടുമ്പാശ്ശേരി അന്താരാഷ്ട്ര വിമാനത്താവളത്തിലെ ടി 3 ടെര്‍മിനലിലാണ് ഹജ്ജ് കഴിഞ്ഞ് മടങ്ങിയെത്തുന്ന ഹാജിമാരെ സ്വീകരിക്കുന്നത്.
ഹാജിമാര്‍ക്ക് വിതരണം ചെയ്യാനുള്ള സംസം വെള്ളം നേരത്തെ തന്നെ നെടുമ്പാശ്ശേരിയില്‍ എത്തിച്ച് ടി 3 യില്‍ പ്രത്യേകമായി സൂക്ഷിച്ചിരിക്കുകയാണ്. ഒക്ടോബര്‍ 4 ന് ഉച്ചയ്ക്ക് 11.45 നാണ് 407 ഹാജിമാരുമായി അവസാന വിമാനം നെടുമ്പാശ്ശേരിയിലെത്തുന്നത്.ഹാജിമാരുടെ മടക്കയാത്രയുടെ ക്രമീകരണങ്ങള്‍ ചര്‍ച്ച ചെയ്ത് തീരുമാനിക്കാനായി സംസ്ഥാന ഹജ്ജ് കമ്മിറ്റി യോഗം ഇന്ന് കരിപ്പൂരില്‍ നടക്കും.