മലപ്പുറം: സീറ്റ് ലഭിക്കാതെ വിദ്യാര്‍ഥികള്‍ നെട്ടോട്ടമോടുമ്പോള്‍ മലപ്പുറം ഗവ. വനിതാ കോളജില്‍ സീറ്റുകള്‍ വെട്ടിക്കുറച്ചു. സര്‍വകലാശാല അംഗീകരിച്ച അന്‍പതിലധികം ഡിഗ്രി സീറ്റുകളാണ് അതീവ രഹസ്യമായി സ്ഥാപന അധികരികള്‍ വെട്ടിക്കുറച്ചത്.
നിര്‍ദിഷ്ട സീറ്റുകള്‍ക്കു പുറമേ ആനുപാതിക സീറ്റ് വര്‍ധനയ്ക്കു സര്‍ക്കാരും സര്‍വകലാശാലയും അംഗീകാരം നല്‍കാറുണ്ട്. മുന്‍കൂട്ടി അപേക്ഷ നല്‍കിയാല്‍ സര്‍വകലാശാല പ്രത്യേക ഉത്തരവിലൂടെയും അംഗീകാരം നല്‍കാറുണ്ട്. ഇത്തരത്തില്‍ കഴിഞ്ഞ വര്‍ഷം വിദ്യാര്‍ഥികള്‍ക്കു പ്രവേശനം നല്‍കിയ സീറ്റുകളാണ് പ്രവേശനം നല്‍കാതെ ഒഴിച്ചിട്ടത്. ആനുപാതിക സീറ്റ് വര്‍ധനവുമൂലം കഴിഞ്ഞ വര്‍ഷം അന്‍പതിലധികം വിദ്യാര്‍ഥികള്‍ക്ക് അധികം പ്രവേശനം ലഭിച്ചിരുന്നു.
ഈ വര്‍ഷത്തെ പ്രവേശന നടപടികള്‍ ഇന്ന് അവസാനിക്കാനിക്കാനിരിക്കെ ബി.എസ്.സി കെമിസ്ട്രി വിഭാഗത്തില്‍ 24 വിദ്യാര്‍ഥികള്‍ക്കു മാത്രമാണ് ഇതുവരെ പ്രവേശനം ലഭിച്ചത്. കഴിഞ്ഞ വര്‍ഷം 48 വിദ്യാര്‍ഥികള്‍ക്കു പ്രവേശനം ലഭിച്ചിരുന്നു. 36 വിദ്യാര്‍ഥികളെ പ്രവേശിപ്പിച്ച ബോട്ടണിയില്‍ ഇത്തവണ 24 പേരെ മാത്രമാണ് പരിഗണിച്ചത്. ബി.എ ഇസ്‌ലാമിക് ഹിസ്റ്ററിയില്‍ കഴിഞ്ഞ വര്‍ഷം 55 വിദ്യാര്‍ഥികള്‍ക്ക് അഡ്മിഷന്‍ ലഭിച്ചിരുന്നു. ഇത്തവണ 40 പേരെ മാത്രമാണ് പരിഗണിക്കുന്നത്. 40 വിദ്യാര്‍ഥികള്‍ക്കു പ്രവേശനം നല്‍കിയ ബി.എ ഇംഗ്ലീഷില്‍ മാത്രമാണ് പരമാവധി സീറ്റില്‍ വിദ്യാര്‍ഥികള്‍ക്കു പ്രവേശനം ലഭിച്ചിട്ടുള്ളത്.
കോട്ടപ്പടി ബോയ്‌സ് സ്‌കൂള്‍ കോമ്പൗണ്ടില്‍ പ്രവര്‍ത്തിച്ചിരുന്ന കോളജ് ഇന്നുമുതല്‍ മുണ്ടുപറമ്പിലെ വാടകക്കെട്ടിടത്തിലാണ് പ്രവര്‍ത്തിക്കുക. സര്‍ക്കാരിന് അധികബാധ്യതയില്ലാതെ വര്‍ധിപ്പിക്കാവുന്ന പരമാവധി സീറ്റുകളില്‍ പ്രവേശനം നേടിയ കുട്ടികളെ ഉള്‍ക്കൊള്ളാവുന്ന സൗകര്യം ഇവിടെ ഒരുക്കിയിട്ടുണ്ട്. ലാബ് ഒഴികെയുള്ള എല്ലാ സൗകര്യവുമുണ്ടായിട്ടും സീറ്റുകള്‍ വെട്ടിക്കുറച്ചതിനെതിരേ വിദ്യാര്‍ഥി യൂനിയനും രംഗത്തെത്തിയിട്ടുണ്ട്.
അതേസമയം, ഏകപക്ഷീയമായി സീറ്റ് കുറച്ചത് അംഗീകരിക്കില്ലെന്നും നടപടി നിരാശാജനകമെന്നും കോണ്‍ഫെഡറേഷന്‍ ഓഫ് കേരളാ കോളജ് ടീച്ചേഴ്‌സ് (സി.കെ.സി.ടി) ജില്ലാ ഭാരവാഹികളായ എം.കെ അബ്ദുര്‍റഹീം, പി.പി ബഷീര്‍ എന്നിവര്‍ പറഞ്ഞു.